Fýtbol: «Qaırat» «Ertisti» oısyrata utyp, «Astanaǵa» jaqyndaı tústi
ASTANA. QazAqparat - Fýtboldan el chempıonatynyń HVІІ týrynda Almatynyń «Qaıraty» óz alańynda Pavlodardyń «Ertisin» qabyldady, dep habarlaıdy QazAqparat tilshisi.
Osy matchta Oraldyń «Aqjaıyǵynan» aýysqan chempıonat surmergenderiniń biri, ýkraınalyq shabýylshy Aderınsola Eseola alǵash ret «Qaırattyń» sapynda alańǵa shyqty.
Almatylyqtar birden oıyn tizginin qolyna alyp, 24-mınýtta brazılııalyq legıoner Isael mergendik tanytty - 1:0. 37-mınýtta Eseolanyń da kezegi keldi. Reseılik Andreı Arshavınnen pas alǵan ol Mılosh Stamenkovıchtan sytylyp shyǵyp, qaqpa buryshyn dál kózdedi. Sóıtip Eseola bıylǵy birinshilikte soqqan gol sanyn 9-ǵa jetkizdi. Al mergender kóshin 11 golmen «Aqtóbe» sapyndaǵy armenııalyq legıoner Markos Pızellı bastap keledi.
42-mınýtta A.Arshavın tepken dop Rýslan Esimovke tıip, baǵytyn ózgertip, Nıkıta Kalmykovtyń qaqpasynan tabyldy.
Ekinshi taımda 58-mınýtta Isael oıyn núktesin qoıdy.
Osylaısha «Ertisti» 4:0 esebimen jeńip, 41 upaı jınaǵan «Qaırat» birinshi oryndaǵy «Astanaǵa» jaqyndaı tústi. Keshe elordalyqtar Qostanaıda «Tobylmen» teń oınap, upaı joǵaltqan bolatyn. Olardyń enshisinde qazir 47 upaı bar, biraq almatylyqtardyń «Astanadan» eki oıyny kem. Demek, bul - chempıondyq ataq úshin báseke báseńdegen joq degen sóz.
Aıta keteıik, keshe Shymkentte týrnır kestesinde tórtinshi oryndaǵy «Ordabasyny» kútpegen jerden 2:1 esebimen tize búktirgen Qyzylordanyń «Qaısary» 6-ynshy satyǵa kóterildi. «Qyzyljar» - «Aqtóbe», «Jetisý» - «Atyraý», «Shahter» - «Aqjaıyq» kezdesýleri 7 shilde kúni ótedi.
