Fýtbol: «Qaırat» ekinshi jeńisine qol jetkizdi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń ekinshi týry bastaldy, dep habarlaıdy QazAqparat tilshisi.
Komandalar 19 jáne 20 naýryz kúnderi ózara sheberlik baıqasady. Alǵashqy kúnde úsh oıyn ótse, kelesi kúnge tórt kezdesý belgilengen.
Ázirge eki oıynnyń nátıjesi belgili boldy. Alǵashqysynda «Taraz» óz alańynda «Qyzyljar» komandasyn qabyldasa, ekinshi oıynda Qyzylordada «Qaısar» Almatynyń «Qaıratymen» sheberlik baıqasty.
«Taraz» jáne «Qyzyljar» arasyndaǵy kezdesýinde esep ashylǵan joq. Komandalar 0:0 esebine qanaǵat bildirip tarasty.
«Qaısar» men «Qaırat» arasyndaǵy oıyn. Ótken jylǵy el chempıony tizgindi óz qolyna alýǵa tyrysty. Oǵan alań ıeleri birinshi kezeńde laıyqty qarsylyq kórsetti. Degenmen 45-mınýtta almatylyq klýb shabýylshysy Vagner Lav esep ashyp ketti.
Ekinshi kezeńde Kamo Oganesıan 62, Danııar Úsenov 77-mınýttarda mergendik tanytty. Oıynda almatylyq klýb 3:0 esebimen jeńiske jetti.
Sondaı-aq, búgin elordalyq «Astana» óz alańynda Aqtaýdyń «Kaspıı» klýbymen jasyl alańǵa shyǵady. Oıyn jergilikti ýaqytpen 18.00-de bastalyp, «Qazsport» telearnasynan tikeleı efırde kórsetiledi.
Al 20 naýryzda «Jetisý» (Taldyqorǵan) men «Turan» (Túrkistan), «Aqjaıyq» (Oral) men «Atyraý», «Shahter» (Qaraǵandy) men «Ordabasy» (Shymkent), «Aqtóbe» men «Tobyl» (Qostanaı) komandalary kezdesedi.
