Fýtbol: «Qaırat» bes mınýtta úsh gol soǵyp, jeńiske jetti
ASTANA. QazAqparat - Fýtboldan premer-lıga komandalary arasynda el birinshiliginiń 12-inshi týryndaǵy eki ortalyq kezdesý de Astanada ótti, dep habarlaıdy «QazAqparat» tilshisi.
«Astana Arena» stadıonynda aldymen Kókshetaýdyń «Oqjetpesi» Almatynyń «Qaıratyn» qabyldady. Bul oıynda alań ıelerinen Sergeı Strýkov 29-ynshy jáne 68-mınýtta qos dop soǵyp, esepti 2:0-ge jetkizdi. Ótken týrda Atyraýda jeńilis tapqan «Qaırat» taǵy da utylatyndaı kóringen. Degenmen olar bes mınýtta úsh gol soǵyp, «Oqjetpesti» jerge qaratyp ketti. Áýeli 74-mınýtta komanda kapıtany, ataqty reseılik oıynshy Andreı Arshavın esepti qysqartsa, bir mınýt ótpeı jatyp, brazılııalyq legıoner Isael tarazy basyn teńestirdi. Al 79-mınýtta ekinshi taımda alańǵa shyqqan Baýyrjan Turysbek mergendik tanytty. Osylaısha, jeńilip jatyp, 3:2 esebimen qarsylasyn utqan «Qaırat» 22 upaımen týrnır kestesinde úshinshi orynǵa kóterildi.
Taǵy bir ortalyq match «Astana Arena» stadıonynda ótip, astanalyqtar kósh basynda kele jatqan komandalardyń biri Pavlodardyń «Ertisin» qabyldady. Munda «Astanadan» Roman Mýrtazaev 13-mınýtta esep ashty. Ekinshi taımda dál sonyń ornyna shyqqan Dıdar Jalmuqan 79-mınýtta Jýnıor Kabananganyń soqqysynan keıin «Ertistiń» qaqpashysy Davıd Lorııa qaıtarǵan dopty qaqpaǵa súńgite saldy. Sóıtip, 2:0 esebimen jeńiske jetken «Astana» 27 upaımen burynǵysha jekedara kósh bastap keledi ári onyń negizgi qarsylastarynan bir oıyny kem. 23 upaımen ekinshi satyda turǵan Shymkenttiń «Ordabasy» komandasy «Atyraýda» 2:2 esebimen teń oınady. Bul kezdesýden shymkenttikterden Tańat Nóserbaev esep ashqanymen, Eldar Abdrahmanov pen Farhat Salomovtyń goldarynan keıin «Atyraý» alǵa shyqty. Tek 85-mınýtta ǵana Azat Nurǵalıev 11 metrlik aıyp dobyn dál oryndap, esepti teńestire aldy.
Qaraǵandyda ataqty fýtbolshy Andreı Fınonchenkony saltanatty túrde shyǵaryp salǵan «Shahter» óz alańynda 82-mınýtta Aıdos Táttibaevtyń alystan soqqan ádemi golynan keıin Oraldyń «Aqjaıyǵyn» utyp, 11-inshi orynǵa kóterildi. «Taraz» da Qyzylordanyń «Qaısarymen» ótken oıynda jeńiske degen jigerin tanyta bildi. Munda «Qaısardyń» kapıtany Maqsat Baıjanov birinshi taım sońynda esep ashty. Onyń ústine 60-mınýtta alań ıelerinen Andreı Gorbanets ekinshi ret eskertý alyp, alańnan qýyldy. Soǵan qaramastan, «Taraz» Mohammed Dıarra men Abzal Taýbaıdyń goldary arqasynda 2:1 esebimen jeńiske jetip, tarazdyqtar 10-ynshy orynǵa shyqty. Al óz alańynda Qostanaıdyń «Tobylyna» 1:3 esebimen ese jibergen «Aqtóbe» komandasy eń sońǵy orynǵa syrǵydy. Bul oıynda «Tobyldan» Alekseı Şetkın, Sergeı Malyı jáne Raýl Djalılov kózge tússe, «Aqtóbeden» Iýrı Mamýte ǵana bir golmen jaýap bere aldy.
El chempıonatynyń kelesi týry 20 mamyrda ótedi. Bul joly «Aqjaıyq» - «Astana», «Ertis» - «Atyraý», «Ordabasy» - «Aqtóbe», «Tobyl» - «Oqjetpes», «Qaısar» - «Shahter», «Qaırat» - «Taraz» komandalary ózara kúsh synasady.
