Fýtbol: «Qaırat» 9-márte Qazaqstan kýbogynyń ıegeri atandy
ASTANA. QazAqparat - Elordadaǵy «Astana-Arena» stadıonynda fýtboldan 2018 jylǵy Qazaqstan kýbogynyń fınaly ótti. Fınalda Almatynyń «Qaıraty» men «Atyraý» komandalary kezdesti, dep habarlaıdy QazAqparat tilshisi.
Almatynyń «Qaıraty» - Qazaqstan kýbogyna eń kóp márte qol jetkizgen komandanyń biri. Ońtústik astanadan kelgen fýtbolshylar búgingi kúnge deıin segiz márte kýbokty jeńip aldy.
«Qaırat» 1992 jyly elimizde atalmysh básekeniń tuńǵysh jeńimpazy atanǵan. Odan keıin 1996, 2000, 2001, 2003, 2014, 2015, 2017 jyldarda kýbokqa qol jetkizgen.
Aıta keterligi, byltyr Qazaqstan kýbogy fınalynda qos komanda ózara sheberlik baıqasqan edi. Ol joly «Qaırat» 1:0 esebimen jeńiske jetti. Komanda tarıhynda Qazaqstan kýbogyn 2009 jyly ǵana ıelengen «Atyraý» sol ketken eseni osy joly qaıtara ma degen úmit boldy.
«Qaırat» komandasy bas bapkeriniń mindetin atqarýshy Andreı Karpovıch alǵashqy mınýttan Pokatılov, Ahmetov, Súıimbaev, Álip, Jýkov, Islamhan, Ábiken, Sokolenko, Paragýlgov, Sársenov, Keılerdi qosty. Al Vıktor Kýmykov olarǵa qarsy «Atyraý» sapynda Logınovskıı, Abdrahmanov, Obshıvach, Ablıtarov, Kýbık, Qalmuratov, Neın, Sergıenko, Haırýllın, Babatýnde, Sıkımıchti shyǵardy.
Oıyn bastalar sátten «Qaırat» qarsylastar qaqpasy mańynda shabýyl uıymdastyrdy. Sol sátterdiń birinde «Atyraý» oıynshylary óz aıyp alańynda ereje buzdy. Tóreshi olardyń qaqpasyna penaltı belgiledi. Ony Baýyrjan Islamhan oryndady. Degenmen ol «Atyraý» qaqpashysy Vladımır Logınovskııden aılasyn asyra alǵan joq. Degenmen almatylyq fýtbolshylar arada nebári 10 mınýt ótkende qarsylastar qaqpasynan sańylaý tapty. Ony Aleksandr Sokolenko soqty. Budan keıin «Atyraý» tarazy basyn teńestirýge umtylǵan. Almatylyq ujym oǵan múmkindik bergen joq.
Ekinshi kezeńniń sońyna taman «Atyraý» oıyn qarqynyn kúsheıte tústi. Degenmen gol soǵatyn birqatar múmkindikterdi múlt jiberip aldy. Oǵan «Qaırat» oıynshylary da qarsy shabýyl uıymdastyrdy. Kezdesý 1:0 esebimen jeńiske jetti. Osylaısha «Qaırat» toǵyzynshy márte Qazaqstan kýbogynyń ıegeri atandy.
Aıta keterligi, búgingi kezdesý nátıjesinde keler jyly eýrokýbok oıyndarynda el namysyn qorǵaıtyn tórtinshi komanda belgili boldy. El birinshiliginde tórtinshi orynǵa turaqtaǵan Shymkenttiń «Ordabasy» Eýropa lıgasynyń irikteý kezeńderinde baq synaıtyn boldy.
Esterińizge sala ketelik, budan buryn «Ertis» Premer-lıgadaǵy ornyn saqtap qalǵanyn habarlaǵan edik.
Sondaı-aq, bıyl birinshi lıgadan Premer-lıgaǵa Kókshetaýdyń «Oqjetpesi» men Tarazdyń «Taraz» komandalary joldama aldy.
