Fýtbol: Qaraǵandynyń «Shahterine» jańa bapker keldi
NUR-SULTAN. QazAqparat – Reseılik maman Magomed Adıev qaraǵandylyq «Shahter» komandasynyń bas jattyqtyrýshysy bolyp taǵaıyndaldy, dep habarlaıdy QazAqparat tilshisi.
«Shahter» fýtbol klýby málim etkenindeı, 43 jastaǵy maman «Nıjnıı Novgorod», «Ahmat» (Groznyı), «Anjı» (Mahachkala), «Chaıka» (Peschanokopskoe) sııaqty komandalarda jumys istegen.
Fýtbolshy retinde TsSKA (Máskeý), «Anjı», «Sokol» (Saratov), «Jeńis» (Nur-Sultan), «Terek» (qazir «Ahmat»), «Krıvbass» (Krıvoı Rog) jáne «Nıjnıı Novgorod» klýbtarynda dop tepken.
Reseı olımpıadalyq quramasy sapynda tórt match ótkizip, eki gol soqty.
2004 jyly «Terektiń» quramynda Reseı kýbogyn ıelendi. Sondaı-aq eki márte (2004, 2007) Reseı chempıonaty birinshi dıvızıonynyń jeńimpazy atandy.
M.Adıev «Shahterde» Alı Alıevti almastyrdy.
Eske sala keteıik, budan buryn «Aqjaıyq» pen «Aqtóbe» syrt alańda jeńiske jetkenin jazǵan bolatynbyz.
Oraldyqtar ótken týrda elordada «Shahterden» basym túsken edi.
