Fýtbol qaqpasy kishkentaı balany basyp qaldy
ALMATY. QazAqparat - Almatyda fýtbolǵa arnalǵan qaqpa kishkentaı balany basyp qaldy, dep habarlaıdy QazAqparat tilshisi.
Áleýmettik jelide oqys oqıǵa bolǵan aýlanyń vıdeosy paıda boldy.
«4 sáýir kúni keshki saǵat 19: 30-da meniń qurbymnyń balasy 8-shi yqsham aýdanyndaǵy №79-úıdiń oıyn aýlasynda oınap júrgen. Fýtbolǵa arnalǵan temir qaqpa balanyń ústine qulap ketti. Sóıtsek, qaqpa bekitilmegen eken. Bala reanımatsııada aýyr halde jatyr. Eshqandaı qaýipsizdik erejelerine saı kelmeıtin, balalar alańyn qalaı ashýǵa bolady «, - dep jazdy jeli qoldanýshy.
Almaty ákimdigi baspasóz qyzmeti bul oqıǵaǵa qatysty túsinik berdi.
Ákimdiktiń habarlaýynsha, 2020 jyly osy meken-jaı boıynsha aýlaǵa EC-EnergyQazaqstan» JShS merdiger kompanııasy kelisimshartqa sáıkes aǵymdaǵy jóndeý jumystaryn júrgizgen. Tapsyrys berýshisi - Áýezov aýdany ákiminiń apparaty.
«Smeta boıynsha, oıyn alańynyń rezeńke jabyndysyn aýystyrý jáne syrtqy jaryqtandyrý qurylǵylaryn aýystyrý jumystary júrgizilgen. 2016 jyly №8 yqshamaýdanyndaǵy №79 úı boıynsha oıyn alańyn, fýtbol alańyn jaqsartý jáne syrtqy jaryqtandyrýdy ornatý jumystary júrgizilip, sodan keıin oıyn alańy men fýtbol alańy kútip ustaý úshin «Ýpravlenıe domamı-14» páter ıeleriniń tutynýshylar kooperatıvine berilgen», - dedi Áýezov aýdany kommýnaldyq sharýashylyq bóliminiń jetekshisi Azat Káketaev.
