Fýtbol: Ivan Antıpov pen Eldar Abdrahmanov «Aqjaıyqqa» qaıtyp oraldy
ORAL. QazAqparat – Oral fýtbolynyń túlekteri Ivan Antıpov pen Eldar Abdrahmanov birinshi lıgada óner kórsetetin «Aqjaıyqqa» qaıtyp oraldy, dep habarlaıdy QazAqparat tilshisi.
«Aqjaıyq» fýtbol klýbynyń bas dırektory Azamat Shaıhynyń aıtýynsha, ekeýimen de kelisimshart jasaldy.
Oral qalasynda fýtbol álippesin úırenip, bolashaǵynan úlken úmit kúttirip, Qazaqstan jastar quramasynda da oınaǵan jartylaı qorǵaýshy Ivan Antıpov ótken jylǵy maýsymdy premer-lıgada Taldyqorǵannyń «Jetisý» klýbynda bastap, «Atyraýda» aıaqtaǵan bolatyn. Al oń qaptaldaǵy qorǵaýshy Eldar Abdrahmanovtyń kezinde «Aqjaıyqtan» «Atyraýǵa» aýysqany belgili.
«Biz negizinen jergilikti fýtbolshylarǵa senim artyp otyrmyz. Bas bapker Artýr Avakıants óz ornynda qalady. Qarajatqa baılanysty komandada legıonerler bolmaıdy. Maqsat – óz kúshimizben premer-lıgaǵa qaıtyp oralý», dedi QazAqparat tilshisine A.Shaıhy.
Taǵy bir ózgeshelik, klýb oqý-jattyǵý jıynyn Túrkııada emes, Shymkentte «BIIK» klýbynyń bazasynda ótkizedi. Oǵan komanda 26 qańtar kúni attanady.
Foto: kazfootball.kz
