Fýtbol: Ispanııanyń «Atletıko» klýby Eýropa lıgasynyń tuńǵysh jeńimpazy atandy
ASTANA. Mamyrdyń 13-i. QazAqparat /Ernur Aqanbaı/ - Ispanııanyń «Atletıko» klýby fýtboldan Eýropa lıgasynyń tuńǵysh jeńimpazy atandy. Keshe Germanııanyń Gambýrg qalasynda ótken aqtyq synda «Atletıko» Anglııanyń «Fýlhem» komandasyn 2:1 esebimen jeńdi.
Matchtyń negizgi kezeńi 1:1 esebimen teń aıaqtalǵandyqtan, komandalar jeńimpazdy qosymsha ýaqytta anyqtady. Matchtyń 116-shy mınótinde ýrýgvaılyq shabýylshy Dıego Forlan soqqan gol «Atletıkoǵa» jeńis syılady. Forlan bul matchtyń sózsiz qaharmany boldy, sebebi «Fýlhem» qaqpasyna birinshi goldy da osy fýtbolshy soqty.
Aıta keteıik, Eýropa lıgasy 2009/2010 jylǵy maýsymda tuńǵysh ret uıymdastyrylyp otyr. Oǵan deıin bul týrnır ÝEFA kýbogy dep atalyp keldi. Eýropa lıgasy qart qurlyqtaǵy dárejesi jaǵynan Chempıondar lıgasynan keıingi ekinshi týrnır bolyp sanalady.
