Fýtbol: Ispanııa depýtattary ÁCh-da qurama jeńisi úshin tólenetin syıaqy kólemin synǵa aldy
ASTANA. QazAqparat - Ispanııa Parlamentiniń depýtattary Brazılııadaǵy Álem chempıonatynda qurama fýtbolshylary jeńiske jetken jaǵdaıda olarǵa tólenetin syıaqy kólemin synǵa alyp otyr.
Atap aıtqanda, depýtattar Ispanııa quramasynyń fýtbolshylary ótken jolǵydaı chempıonatty jeńse, ár oıynshyǵa 720 myń eýro (980 myń dollar) kóleminde bonýs tólenedi degen habarlamaǵa narazylyq bildirdi. 2010 jylǵy Álem chempıonatynda ıspandyq fýtbolshylarǵa 600 myń eýrodan berilgen edi. Parlamentarıı Hosep Entonı Dýran Twitter-degi paraqshasynda Ispanııa chempıondyq tıtýl úshin óziniń quramasyna Germanııa fýtbolshylaryna qaraǵanda eki eseden astam syıaqy beritinin atap ótken. «Sonda biz Germanııadan eki esege baı bolǵanymyz ba?» - dep tańdanyp otyr ol. Máselen, Germanııa quramasynyń oıynshylary álem birinshiliginde jeńiske jetse, árqaısysy 300 myń eýrodan alady eken. Aıta keteıik, Ispanııa ekonomıkasy 2008 jylǵy álemdik qarjy daǵdarysynan keıin áli kúnge deıin qalpyna kele almaı jatyr. Bul elde jumyssyzdyq deńgeıi joǵary deńgeıge jetti, ıaǵnı ol ótken jylǵy birinshi toqsanda 27 paıyzdan asyp tústi. Fýtboldan Álem chempıonaty 12 maýsym men 13 shilde aralyǵynda Brazılııanyń 12 qalasynda ótedi. Dúbirli dodany Rıo-de-Janeıro, Resıfı, Salvador, San-Paýlý, Portý-Alegrı, Manaýs, Fortaleze, Natal, Belý-Orızontı, Brazılıa, Kýıaba jáne Kýrıtıbe qalalary qabyldaıdy. Álem birinshiligine 32 komanda qatysady.
