Fýtbol: Iran sońǵy mınýttarda Ýelsti jeńip ketti
Toptyq básekeniń bastapqy týrynda Ýels AQSh-pen teń oınasa, Azııada reıtınginde kósh bastap turǵan Iran Anglııaǵa iri eseppen (2:6) ese jibergen edi.
Qos komandaǵa da upaı asa qajet ekendigi túsinikti. Rob Peıdj jattyqtyratyn Ýels sońǵy oıynyn Anglııamen ótkizetindikten, Irannan qalaıda úsh upaıdy julyp alýdy kózdeıdi. Birinshi kezdesýinde jankúıerlerin jerge qaratqan ırandyqtardyń tipti sheginer jeri joq edi. Sondyqtan bolsa kerek, portýgalııalyq maman Karlýsh Keırýsh shabýyl shebine Mehdı Taremıdiń qasyna Reseı chempıonatynda óner kórsetken Serdar Azmýndy qosty.
Básekeni tym-táýir bastaǵan ırandyqtar 15-mınýtta qarsylastar qaqpasyna dop ta engizdi. Biraq Alı Golızade oıynnan tys qalǵandyqtan, gol eseptelmedi.
Ekinshi kezeńde 51-mınýtta S.Azmýn, ile-shala A.Golızade tepken dop qaqpa jaqtaýynan keri serpildi. Jol bolmaý degen osy shyǵar. Ýels qaqpashysy Ýeın Hennessı ırandyqtardyń soqqysyn áldeneshe ret qaıtardy. 84-mınýtta alǵa umtylǵan M.Taremıge qarsy oıyn tártibin óreskel buzǵan Ý.Hennessı alańnan qýyldy. Bul bıylǵy birinshilikte fýtbolshyǵa kórsetilgen alǵashqy qyzyl qaǵaz edi.
Qosymsha 9-mınýtta ekinshi taımda alańǵa qosylǵan Rýzbe Cheshmıdiń alystan qaqyrata tepken doby qaqpa buryshynan bir shyqty – 1:0. Sodan keıin M.Taremıden pas alǵan Ramın Rezaeıan núkte qoıdy.
Osylaısha, asa tartysty matchta Iran 2:0 esebimen jeńiske jetti. Iran qorjynynda úsh, Ýelste bir ǵana upaı bar.
Búgin sondaı-aq bul topta Anglııa – AQSh quramalary myqtyny anyqtaıdy.
Eske sala keteıik, budan buryn fýtboldan álem chempıonatynda Portýgalııanyń Ganany utyp, óz tobynda kósh bastaǵanyn jazǵan bolatynbyz.
Sondaı-aq Krıshtıaný Ronaldý bes álem chempıonatynda gol soqqan birinshi oıynshy atandy.
Serbııamen matchta Rısharlıson Brazılııany jeńiske jetkizdi.
Argentına men Germanııa favorıtterdiń úzdik úshtiginen shyǵyp qaldy.
Foto:.instagram.com/fifaworldcup/
