Fýtbol: Frantsııanyń PSJ komandasy chempıon bolyp tanyldy
NUR-SULTAN. QazAqparat - Frantsııanyń PSJ komandasy fýtboldan óz eliniń birinshi lıgasynyń chempıony retinde tanyldy, dep habarlaıdy QazAqparat tilshisi lıganyń saıtyna silteme jasap.
Bul eldegi dop dodasyndaǵy 28-týr oıyndary 8 naýryz kúni ótti. Birinshilikti tolyq aıaqtaý úshin klýbtar taǵy on oıyn ótkizýi tıis bolatyn. Koronavırýs pandemııasyna baılanysty lıga basshylyǵy oıyndardy keıinge shegerýge sheshim qabyldady. Degenmen, mamandardyń ortaq uıǵarymymen 2019/2020 jylǵy kezeńdi erte aıaqtaý týraly naqty sheshim shyqty.
Nátıjesinde PSJ chempıon ataǵyna qol jetkizse, «Olımpık» (Marsel) jáne «Renn» komandalary úzdik úshtikten kórindi. Bul komandalar UEFA Chempıondar lıgasynda baq synaıdy. Al odan keıingi oryndardaǵy «Lıll», «Reıms» jáne «Nıtstsa» UEFA Eýropa lıgasynda el namysyn qorǵaıdy.
Sońǵy eki oryndaǵy «Amen» jáne «Týlýza» endi ekinshi lıgaǵa túsip qalsa, olardyń ornyn ekinshi lıgada alǵashqy eki orynǵa ıe bolǵan «Lorıan» jáne «Lans» basty.
Budan buryn fýtboldan Nıderlandy birinshiligi de erte aıaqtaldy. Bul elde eshqandaı komanda jeńimpaz ataǵyna ıe bolǵan joq. Eýrokýbokqa qatysatyn klýbtar týrnır kestesindegi ornalasý jaǵdaıyna baılanysty anyqtaldy.
Esterińizge sala ketelik, fýtboldan Qazaqstan birinshiligi eki týrdan keıin koronavırýs pandemııasyna baılanysty keıinge shegerilgen bolatyn. Qazaqstan fýtbol federatsııasy birinshilik maýsym aıynda qaıta jalǵasýy múmkin ekenin habarlady.
