Fýtbol: FIFA bıylǵy ÁCh matchtary bıletteriniń jańa partııasyn satylymǵa shyǵardy
ASTANA. KAZINFORM – 2026 jylǵy fýtboldan álem chempıonatynyń bastalýyna 50 kún qalǵanda FIFA bıletterdi satýdyń sońǵy kezeńin qaıta bastady. Olar barlyq 104 matchqa «kim birinshi úlgeredi — bılet soǵan» qaǵıdaty boıynsha satylymǵa shyǵarylady, dep habarlaıdy Reuters agenttigi.
Halyqaralyq fýtbol federatsııasy 11 maýsymnan bastap AQSh, Meksıka jáne Kanadada ótetin matchtardiń bıletterin satýdyń sońǵy kezeńi bastalǵanyn jarııalady.
FIFA málimetinshe, qazirgi ýaqytqa deıin kútilip otyrǵan 6 mıllıonnan astam bılettiń 5 mıllıonnan astamy satylyp ketken. Satylymda 1–3-sanattaǵy oryndar, sondaı-aq naqty matchqa baılanysty alań jıegindegi oryndarǵa bıletter qoljetimdi bolady.
Uıymnyń habarlaýynsha, bıletter bolǵan jaǵdaıda olardyń qosymsha partııalary 19 shildede ótetin fınalǵa deıin satylymǵa shyǵarylyp otyrady.
Týrnırdiń baǵa saıasaty buǵan deıin synǵa ushyraǵan bolatyn. Amerıkalyq zań shyǵarýshylar toby FIFA-ny bılet baǵasyn tómendetýge shaqyryp, dınamıkalyq baǵa belgileý fýtbol matchtaryn jankúıerler úshin qoljetimsiz etip jatqanyn málimdedi.
Buǵan jaýap retinde FIFA aınymaly baǵa belgileý tetigin qoldanatynyn habarlady. Baǵalar suranys pen qoljetimdilikke qaraı avtomatty túrde emes, qolmen túzetiledi.
Sonymen qatar jeltoqsan aıynda baǵasy 60 dollardan bastalatyn Supporter Entry Tier sanatyndaǵy bıletterge shekteýli kvota engizilgen bolatyn. Olar qatysýshy múshe qaýymdastyqtarǵa bólinetin bıletterdiń jalpy sanynyń shamamen 10 paıyzyn quraıdy.
Bıletterdi satý 22 sáýir, sársenbi kúni ashyldy.
Buǵan deıin FIFA 2026 jylǵy fýtboldan álem chempıonaty fınalyna rekordtyq baǵa belgilegeni habarlanǵan edi. Eń qymbat bıletterdiń quny 10 990 dollarǵa deıin jetken.
Al buǵan deıin 2026 jylǵy álem chempıonatynyń bıletterine suranys tym joǵary ekenin jazdyq.
