FÝTBOL. Eýropa lıgasy: «Qaırat» - «Esberg» 1:1
ALMATY. QazAqparat - Búgin Almatynyń «Qaırat» komandasy óz alańynda Eýropa Lıgasynyń ekinshi irikteý kezeńi aıasynda Danııanyń «Esberg» komandasyn qabyldady.
Oıyn bastalysymen-aq «qaırattyqtar» tizgindi óz qoldaryna aldy. «Alǵa Qaırat!», «Alǵa Qaırat!» - dep stadıondy basyna kótergen jankúıerler qaýymy otandastaryna dem berip, qyzý qoldaýmen boldy. Degenmen, danııalyqtar da kóp uzamaı esterin jıyp, qarymta shabýyldarǵa shyǵa bastady.
Alǵashqy qaýipti sát oıynnyń 16-mınýtynda oryn aldy. Áriptesinen pas alyp, aıyp alańyna kirgen Jerar Goý doptan aıyrylyp qaldy. Oıynnyń 26-mınýtynda sol qaptaldan aıyp alańyna tebilgen dopqa Jerer Goý sekirip jete almady.
Alǵashqy taımnyń ekinshi jartysyna qaraı dopqa ıelik etýde danııalyqtardyń basymdyǵy sezile bastady. Dopqa kenedeı jabysqan olar bir-birine utymdy pas berip, dopty aıyp alańyna jetkize salysymen qaqpaǵa qaraı tebýmen boldy. Abyroı bolǵanda dop kóp jaǵdaıda qaqpadan syrt ketti. Al «qaırattyqtar» dopty qarsylastardyń aıyp alańyna jetkizgenderimen qaqpaǵa dál soqqy jasaý jaǵy osal túsip jatty. Aıyp alańyna birneshe ret asyrylǵan dopqa shabýylshylarymyz sekirip jete almaı-aq qoıdy.
Oıynnyń ekinshi jartysynda «qaırattyqtar» esep ashyp, jankúıerlerdiń mereıin ústem etti. Oıynnyń 50-mınýtynda «Qaırat» oıynshysynyń aıyp alańynyń syrtynan tepkeni doby «Esberg» qorǵaýshysynyń qolyna tıip, 11 metrlik aıyp doby belgilendi. Iosıp Knejevıch qaqpashyny aldap soǵyp, dopty torda týlatty. Esep 1:0.
Jankúıerler daýystaryn aıamaı, qarlyqsa da qoldaýlaryn údete túskenimen oıyn sıpaty asa ózgere qoıǵan joq. Danııalyqtar dopty ýystarynan shyǵarmaı «qaırattyqtardyń» aıyp alańyna ońaı jetkizip, qaqpaǵa dál tebýge tyrysyp jatty. Oıynnyń 63-mınýtynda Artýr Edıgarıannyń ornyna Stanıslav Lýnın shyqsa, 86 mınýtynda Iosıp Knejevıchti Isael da Sılva almastyrdy. Degenmen bul, oıyn sıpatyna áser ete qoıǵan joq.
Ókinishke qaraı, oıyn aıaqtalarǵa birer mınýt qalǵanda danııalyqtar kezekti shabýylyn sátti aıaqtap, esepti teńestirip ketti. Esep - 1:1.
Osymen, oıyn teń aıaqtaldy. Qarymta oıyn 24 shilde kúni Danııada ótedi.
Bul oıynǵa komandalar tómendegideı qurammen shyqty.
«Qaırat» komandasy: Dmıtrıı Homıch, Ermek Qýantaev, Aleksandr Kıslıtsın, Samat Smaqov, Záýirbek Plıev, Iosıp Knejevıch, Mıhaıl Bakaev, Baýyrjan Islamhan, Lıýbomır Mıhalık, Artýr Edıgarıan jáne Jerar Goý jasyl alańǵa shyqty.
«Esberg» komandasy: Martın Dýbravka , Mıkael ıAkobsen, Eddı Gomesh, Raıan Laýrsen, Magnýs Lekven, Ieppe Andresen, Djerrı Lýsena, Mohammed Fella, Mık van Býre jáne Emıl Lıýng.
