FÝTBOL: Eýropa arenasynda Qazaqstan abyroıyn kóterý mindeti tur - E. Qojaǵapanov
ASTANA. QazAqparat - Qazaqstan fýtbol federatsııasynyń keńsesinde federatsııa prezıdenti Erlan Qojaǵapanovtyń tóraǵalyǵymen jattyqtyrýshylar keńesi ótti.
Jattyqtyrýshylar keńesinde ulttyq, jastar jáne jasóspirimder quramalary bapkerleriniń esebi tyńdaldy. Bul týraly Qazaqstan fýtbol federatsııasynyń baspasóz qyzmetinen habarlandy.
Jıyn barysynda Qazaqstan ulttyq quramasynyń 28 jáne 31 naýryz kúnderine Islandııa men Reseımen ótkizetin oıynǵa daıyndyq jospary talqylandy. Sonymen qatar, ulttyq qurama múshelerin medıtsınalyq turǵydan qoldaý, 23 jasqa deıingi fýtbolshylardyń quramasyn jasaqtaý máselesi aıtyldy. Munda jas ereksheligi boıynsha jastar quramasynan ótken talantty oıynshylar jınalady. Olar klýbtardaǵy oıyn tájirıbesiniń jetispeýinen ázirge ulttyq quramaǵa ilige almaýda.
Qazaqstan jastar quramasynyń aǵa jattyqtyrýshysy Saýlıýs Shırmıalıs óz komandasynyń Dostastyq Kýbogyndaǵy ilgeri tustaryn aıta otyryp, problemalyq pozıtsııalarǵa da toqtaldy.
«Bizdiń basty másele - ortalyq alańda oınaıtyn fýtbolshy joq. Olar bul pozıtsııa boıynsha Premer-Lıga klýbtarynda oınamaıdy. «Qaırat» sapynda Tımýr Rýdoselskııdiń maýsymdy ortalyq qorǵaýshy retinde bastaǵany qýantady. Jýkov - «Astana» komandasynyń ortalyq jartylaı qorǵaýshysy. Men klýbtardyń Túrkııada ótkizgen oqý-jattyǵý jıynyn qarap shyqtym. Birneshe jańa fýtbolshynyń oıynyn kórdim. Sonymen qatar, Germanııada bizdiń quramany kúsheıte túsetin 1-2 oıynshy bar», dedi ol.
Qazaqstan fýtbol federatsııasynyń prezıdenti Erlan Qojaǵapanov jattyqtyrýshylar keńesin qorytyndylaı kele, qurama komandalardyń aldyna 2015 jylǵa tapsyrma qoıdy. Mindet - irikteý týrnırlerinde joǵary nátıjege qol jetkizý.
«Bizdiń aldymyzda tartysty oıyn kórsetip, Islandııa quramasymen ótkizetin kezdesýde oń nátıjege jetý mindeti tur. - Jastar quramasy jaqynda EÝRO-2017 irikteý týrnırine qatysady. Biz jastar fýtbolynda Anglııa men Norvegııa quramalarynyń kóshbasshy ekenin bilemiz, alaıda Shveıtsarııa men Bosnııa jáne Gertsegovına quramalarynan upaı alýǵa bolady. Karles Martorell men Oırat Sádýov Qazaqstan jasóspirimder quramasymen alǵash ret resmı match ótkizbek. Sizderdiń aldaryńyzda bizdiń jasóspirimderdi osy oıyndarǵa daıyndap, Eýropa arenasynda Qazaqstan abyroıyn kóterý mindeti tur», - dedi Qazaqstan fýtbol federatsııasynyń prezıdenti Erlan Qojaǵapanov.
