Fýtbol: Erkebulan Seıdahmettiń komandasy kútpegen jerden «Krasnodardy» utyp ketti
ORAL. QazAqparat - Fýtboldan premer-lıga komandalary arasynda Reseı chempıonatynyń kezekti týrynda Krasnodarda jergilikti komanda «Ýfany» qabyldady, dep habarlaıdy «QazAqparat» tilshisi.
«Krasnodar» komandasy 40 upaımen osyǵan deıin týrnır kestesinde tórtinshi orynda kele jatqan edi. Al 31 upaıy bar bashqurtstandyqtar altynshy satyda bolatyn. Sondyqtan mamandar alań ıelerine basymdyq bergen edi.
Match barysynda «Krasnodar» basymdyq kórsetkenimen, qonaqtar da qarap qalmady. 72-mınýtta qarymta shabýyl kezinde horvatııalyq Ivan Paýrevıch esep ashty. Budan keıin alań ıeleri alǵa umtylǵanymen, eshteńe bitire almady.
Osylaısha Sergeı Semak jattyqtyratyn ýfalyqtar 1:0 esebimen jeńiske jetip, 34 upaımen altynshy orynǵa bekı tústi.
Aıta keteıik, «Ýfa» quramynda «Qazaq Messıi» atanǵan shabýylshy, 18 jasar Erkebulan Seıdahmettiń oınaıtyny belgili. Bul joly ol qosalqy quramda bolyp, alańǵa shyqqan joq. Ótken týrda «Anjı» komandasymen oıynda Erkebulannyń ekinshi taımda alańǵa shyǵyp, qos birdeı nátıjeli shabýylǵa qatysqanyn jazǵan bolatynbyz. Sonymen qatar E.Seıdahmet Qazaqstan ulttyq quramasyna da shaqyrtý aldy.
