Fýtbol: Erkebulan Seıdahmet «Ýfa» quramynda ekinshi oıynyn ótkizdi
ASTANA. QazAqparat - Qazaqstan ulttyq quramasynyń múshesi Erkebulan Seıdahmet Reseıdiń premer-lıgasynda oınaıtyn «Ýfa» quramynda ekinshi oıynyn ótkizdi, dep habarlaıdy QazAqparat tilshisi.
Týla qalasynda jergilikti «Arsenalmen» ótken matchta «Qazaq Messıi» atanǵan qazaqstandyq shabýylshy oıyn bitýge on mınýttan astam ýaqyt qalǵanda, komanda kapıtany, qorǵaýshy Boıan Iokıchtiń ornyna shyqty.
Bul kezde alań ıeleri 2:1 esebimen jeńip jatqan-dy. Ýaqyt az berilgendikten, Erkebulan baýyryn jazyp úlgermedi.
Atalmysh kezdesýde «Arsenal» «Ýfa» komandasyn aqyry sol eseppen utyp, týrnır kestesinde altynshy orynǵa kóterildi. Al «Ýfa» jetinshi satyǵa syrǵydy.
Eske sala keteıik, on segiz jasar Erkebulan Seıdahmettiń «Ýfa» quramynda alǵash ret 10 naýryz kúni Bashqurtstan astanasynda «Anjımen» ótken kezdesýde alańǵa shyǵyp, gol soǵylǵan qos birdeı shabýylǵa qatysqanyn jazǵan bolatynbyz. Odan keıin Qazaqstan quramasy sapyndaǵy birinshi oıynynda Vengrııa qaqpasyna gol soqqan edi.
