Fýtbol: Erkebulan Seıdahmet «Qaıratqa» oraldy
NUR-SULTAN. QazAqparat – Qazaqstandyq fýtbolshy Erkebulan Seıdahmettiń «Jetisýmen» kelisimshart merzimi aıaqtalyp, ol «Qaıratqa» qaıta oraldy, dep habarlaıdy QazAqparat Sports.kz saıtyna silteme jasap.
Aıta keteıik, 20 jastaǵy E.Seıdahmet – shabýylshy. Onyń sońǵy maýsymdardaǵy statıstıkasy kóńil kónshiterlik emes. 2018 jyldyń aqpanynda ol sporttyq mansabynda alǵash ret sheteldik klýbqa - reseılik «Ýfaǵa» ótti. Alaıda, Seıdahmet onda 4 match qana dop tepti. Keıin bolgarııalyq «Levskı»-ge aýysty. Biraq onda da nátıje aıtarlyqtaı bolmady: 3 matchta kózge túse almady.
Erkebulan «Qaıratta» da asa erekshelenbegen edi: 15 matchta 1 gol jáne golmen aıaqtalǵan 3 pas.
Al «Jetisýda» ol 5 match oınady: onyń birde-birinde gol soqpady jáne dopty qaqpaǵa túsiretin pastar bermedi.
Qazirgi ýaqytta Transfermarkt.de portaly qazaqstandyq fýtbolshyny 250 myń eýroǵa baǵalaýda.
