Fýtbol: Elordada sheteldik qazaq jastarynyń qatysýymen týrnır ótedi
NUR-SULTAN. QazAqparat - 27-28 sáýirde elordada tarıhı Otanyna oralǵan, sondaı-aq shet elderde turatyn otandastarymyzdyń arasynda shaǵyn fýtboldan halyqaralyq týrnır ótedi, dep habarlaıdy QazAqparat.
Bul básekeni «Otandastar qory» KEAQ jáne Dúnıejúzilik qazaqtar qaýymdastyǵy uıymdastyryp otyr.
Týrnır Qazaqstan Respýblıkasynyń Mádenıet jáne sport mınıstrligi Sport komıteti jáne L.Gýmılev atyndaǵy Eýrazııa ulttyq ýnıversıtetiniń qoldaýymen ótkizilmek.
Aıta keter jaıt, bıylǵy, besinshi ret uıymdastyrylatyn ala dop básekesi Jastar jylyna arnalady.
Dop dodasyna qandastarymyz jıi qonystanǵan Mońǵolııa, Qytaı, Ózbekstan, Túrkııa, Aýǵanstan, Iran, Reseı, Qyrǵyzstan tárizdi alys ta jaqyn shet eldermen qatar Astana, Almaty, Shymkent qalalarynan jáne oblystardan barlyǵy 30-ǵa jýyq komandalar qatysady dep kútilýde.
Atalǵan shara buqaralyq sportty damytý, óskeleń urpaqty patrıottyq rýhta tárbıeleý, olardy otansúıgishtikke baýlý jáne otandastarymyzǵa tarıhı Otanyna oralýyna yqpal ete otyryp, elimizdiń jetistikterin kórsetý maqsatynda ótkizilmek.
Sharanyń júlde qory 3 mıllıon teńgeni quraıdy. Komandalardy juptaý 26 sáýir, saǵat 16:00 de Otandastar qorynda (Qonaev kóshesi, 12/1) júrgiziledi. Týrnırdiń bastalýy 27 sáýir, saǵat 9:00 de, Jas-Batyr sport kesheninde (Konstıtýtsııa kóshesi, 3) ótedi.
