Fýtbol: El chempıony «Tobyl» «Aqjaıyqtan basym tústi
NUR-SULTAN. QazAqparat – Fýtboldan Qazaqstan chempıonatynyń alǵashqy týrynda Qostanaıda jergilikti «Tobyl» men Oraldyń «Aqjaıyǵy» alańǵa shyqty, dep habarlaıdy QazAqparat tilshisi.
Ótken jyly qostanaılyqtar úzdik óner kórsetip, el chempıony atansa, bıyl sýperkýbokty da utyp alǵan edi.
«Aqjaıyq» toǵyzynshy orynǵa taban tiregen bolatyn.
Jańa maýsymda qos komanda quramynda biraz ózgerister boldy.
Birinshi taım ortasynda «Aqjaıyqqa» Qaraǵandynyń «Shahterinen» aýysyp kelgen Qazaqstan ulttyq quramasynyń shabýylshysy Oralhan Ómirtaev jaraqat aldy da, ornyna ýkraınalyq legıoner Igor Karpenko shyqty.
Alań ıeleriniń basymdylyǵymen ótkenimen, alǵashqy taımda esep ashylǵan joq.
Matchtyń ekinshi kezeńinde buryshtamadan keıin qostanaılyq Aleksandr Marochkın baǵyttaǵan dop qaqpa mańdaıshasynan keri qaıtty. 78-mınýtta «Tobyldyń» kapıtany Ashat Taǵybergen tepken dopty «Aqjaıyqtyń» qaqpashysy, ýkraınalyq Konstantın Mahnovskıı qaıtarǵanymen, ózbekstandyq Igor Sergeev birinshi bolyp jetip, esep ashty – 1:0.
Budan keıin oraldyqtardy jattyqtyratyn ýkraınalyq maman Vladımır Mazıar birneshe oıynshyny tyńnan qosqanymen, odan eshteńe ózgergen joq.
Búgin el chempıonatynyń alǵashqy týry aıasynda ótken jylǵy qola júldeger «Qaırat» Almatyda «Aqtóbeni» 2:0 esebimen tize búktirdi. Qos goldy da ekinshi taımda alańǵa shyqqan Hose Kante soqty.
Osylaısha «Qaırat» týrnır kestesinde dop aıyrmasymen kósh bastady.
Ekinshi týrda «Tobyl» 11 naýryzda Aqtaýda «Kaspıımen» sheberlik baıqassa, «Aqjaıyq» óz alańynda Túrkistannyń «Turanyn» qabyldaıdy.
Eske sala keteıik, budan buryn «Aqjaıyqqa» jańadan tórt oıynshy alynǵanyn jazǵan bolatynbyz.
