Fýtbol: el chempıonatynda «Astana» men «Ordabasy» kósh bastap keledi

Qazir qos komandanyń da 12 upaıy bar.

Tórtinshi týrda astanalyqtar Pavlodarda jergilikti «Ertisti» tizerletti. Bul oıynda qazaq fýtbolynyń jas juldyzdarynyń biri, Qazaqstan ulttyq quramasyna bıyl alynǵan Baqtııar Zaınýtdınov het-trıktiń avtory atanyp, óziniń sheberligi ósip kele jatqanyn kórsetti. Budan keıin Roman Murtazaev, ıÝrıı Pertsýh jáne Marın Tomasov esepti 6:0-ge jetkizdi. Tek osydan keıin ǵana 90-mınýtta Gondýras eliniń ókili Eddı Ernandes esepti qysqarta aldy.

«Ertis» sporttyq tarıhynda óz alańynda qaqpasyna alǵash ret alty dop jiberip alyp, 1:6 esebimen oısyraı jeńildi. Al elordalyqtar chempıondyqtan negizgi úmitker ekendigin taǵy da dáleldedi.

Taǵy bir upaı joǵaltpaǵan komanda - shymkenttikter óz alańynda «Aqtóbeni» 3:1 esebimen utty. Bul machta alań ıelerinen Temirlan Erlanov, Tımýr Dosmaǵambetov, Ivan Nagaev mergendik tanytsa, qonaqtardan Hrvoe Mılıchevıch bir ǵana golmen jaýap qaıyrdy.

Almatynyń «Qaıraty» týrnır kestesinde 10 upaımen úshinshi orynda keledi. Isael, Ýgo Sılveıra jáne ekinshi taımda alańǵa shyqqan Georgıı Jýkov gol soqqan oıynda «Qaırat» Oraldyń «Aqjaıyǵyn» 3:0 esebimen utty.

Óz alańynda asa tartysty básekede «Atyraýdan» 3:2 esebimen basym túsken Qostanaıdyń «Tobyly» 9 upaımen tórtinshi orynǵa kóterildi.

Petropavldyń «Qyzyljaryn» 2:1 esebimen tize búktirgen Qaraǵandynyń «Shahterinde» 7 upaı bar. Ol «Ertisti» yǵystyryp, besinshi satyǵa jaıǵasty. Óz alańynda Qyzylordanyń «Qaısaryn» jeńgen Taldyqorǵannyń «Jetisý» komandasy segizinshi orynǵa shyqty.

Aldaǵy senbi, 14 sáýir kúni ótetin besinshi týrda ortalyq match oınalady. Elordada «Astana» Almatynyń «Qaıratyn» qabyldaıdy. Mine, osy kezdesýde chempıondyqtan úmitker qos komandanyń shama-sharqy tolyq belgili bolady. Sondaı-aq sol kúni «Qaısar» - «Ertis», «Aqjaıyq» - «Ordabasy», «Aqtóbe» - «Tobyl», «Atyraý» - «Shahter», «Qyzyljar» - Jetisý» oıyndary ótedi.