Fýtbol: El birinshiligindegi úzdikter anyqtaldy
NUR-SULTAN. QazAqparat - Qazaqstan kásipqoı fýtbol lıgasy bıylǵy dop dodasyndaǵy úzdikterdi anyqtady, dep habarlaıdy QazAqparat tilshisi.
Premer-lıga úzdikteri fýtbol klýbtarynyń jetekshileri, bas bapkerleri, komanda kapıtandarynyń daýys berý nátıjesi boıynsha belgili boldy. Olardyń nazaryna úzdik bes úmitkerden turatyn tizim usynyldy. Daýys berýshilerdiń árbiri úsh úmitkerdi tańdady. Birinshi orynǵa - úsh upaı berilse, odan keıingi oryndarǵa eki jáne bir upaıdan jazyldy. Barlyq upaıdy sanaý arqyly saýalnama qorytyndylandy.
Nátıjesinde eń úzdik shabýylshy retinde almatylyq «Qaırattyń» brazılııalyq legıoneri Vagner Lav top jardy. Ol 80 upaı jınady. Odan keıingi oryndarda Abat Aıymbetov («Qaırat») – 66, Elgýdja Lobjanıdze («Qaısar»), Sergeı Zenev («Shahter»), Pedro Eýjenıo («Jetisý») bar.
Al jartylaı qorǵaýshylar qatarynan 68 upaı jınaǵan «Ordabasy» oıynshysy Joao Paolo birinshi oryn aldy. Kelesi kezekte Ashat Taǵybergen («Qaısar»), Aıbol Ábiken («Qaırat»), Djaba Kankava («Tobyl»), Tıgran Barsegıan («Astana») alǵashqy bestikte boldy.
Qorǵanysta 74 upaı jınaǵan «Qaırat» oıynshysy Ǵafýrjan Súıimbaevqa teń kelerlik eshkim bolǵan joq. Odan keıingi oryndarǵa Nuraly Álip («Qaırat»), Sergeı Malyı («Tobyl»), Rade Dýgalıch («Qaırat»), Іlııas Ámirseıitov («Qaısar») ornalasqan
Al qaqpashylar arasynda «Tobyl» oıynshysy Aleksandr Mokın 59 upaı jınap, úzdikter kóshin bastady. Alǵashqy úzdik bestikke Stas Pokatılov («Qaırat»), Nenad Erıch («Astana»), Marko Mıloshevıch («Kaspıı»), Mıroslav Lobantsev endi.
