Fýtbol: eki sheteldik oıynshy «Aqjaıyqtyń» qataryn tolyqtyrdy

ORAL. QazAqparat – Eki sheteldik oıynshy premer-lıgada óner kórsetetin «Aqjaıyq» komandasyna alyndy, dep habarlaıdy QazAqparat tilshisi.

«Aqjaıyq» fýtbol klýbynyń baspasóz qyzmetinen málim etkenindeı, jartylaı qorǵaýshylar, reseılik Artýr Gazdanov pen brazılııalyq Rafael Sabıno dos Santospen kelisimshartqa qol qoıyldy.

Máskeýlik TsSKA klýbynyń túlegi, 29 jastaǵy A.Gazdanov sporttyq jolynda «Alanııa», «Volgar», «KAMAZ», «Avangard», «Tıýmen» jáne «Akron» komandalarynda dop tepti. Bıylǵy maýsymda «Akron» sapynda 12 match ótkizip, 1 gol soqty.

A.Gazdanov «Aqjaıyq» pen reseılik «Rotor» (Volgograd) arasynda ótken baqylaý oıynynda da mergendik tanytyp, esep ashqan bolatyn.

Brazılııalyq «Gremıo» klýbynda fýtbol álippesin úırengen 25 jastaǵy Rafael Sabıno dos Santos sońǵy tórt maýsymdy «Lvov» (Ýkraına) komandasy sapynda ótkizdi.

Eske sala keteıik, budan buryn Qazaqstan quramasynyń oıynshysy «Aqjaıyqtan» «Turanǵa» aýysqanyn jazǵan bolatynbyz.

Sondaı-aq Qazaqstan ulttyq quramasyna shaqyrylǵan oıynshylar belgili boldy.