Fýtbol: Denıs Glavına «Aqjaıyqqa» qaıtyp oraldy
ORAL. QazAqparat - Horvatııalyq qorǵaýshy Denıs Glavına «Aqjaıyqqa» qaıtyp oraldy, dep habarlaıdy QazAqparat tilshisi.
«Aqjaıyq» fýtbol klýbynyń baspasóz qyzmetinen túsken málimetke qaraǵanda, Glavına sporttyq jolyn «Dınamonyń» (Zagreb) jastar komandasynda bastady.
Horvatııalyq oıynshy sondaı-aq «Dınamo» (Kıev), «Vorskla», «Dnepr», «Dınamo» (Zagreb), «Arka» (Polsha), «Varajdın», «Splıt» (ekeýi de Horvatııa), «Zavrch» (Slovenııa) komandalarynda dop tepti.
Glavınanyń Qazaqstandaǵy alǵashqy klýby Qostanaıdyń «Tobyly» boldy. Sonyń quramynda 2016 jyly 27 matchta bir gol soqty. 2017 jyldyń jazynda Denıs Oraldyń «Aqjaıyǵyna» aýysyp, 14 oıynda qos goldyń avtory atandy. Ol qorǵanysty bekem ustaýmen birge kerek kezinde shabýylǵa da qosyla alady.
Bıyl jyl basynda Taldyqorǵannyń «Jetisý» komandasynyń sapynan tabylǵan Glavına 14 kezdesý ótkizdi. Endi ol «Aqjaıyq» sapynda úshinshi nómirmen oınaıtyn bolady.
Aıta keteıik, budan buryn qatarynan tórt márte jeńilis tapqan «Aqjaıyq» ótken týrda Qaraǵandyda «Shahterdi» 2:1 esebimen tize búktirip, týrnır kestesinde qaıtadan 6-ynshy orynǵa kóterildi. 14 shilde kúni Artýr Avakıantstyń shákirtteri segizinshi satyda kele jatqan «Qyzyljar» (Petropavl) komandasyn qabyldaıdy. Osy kúni sondaı-aq «Astana» - «Shahter», «Aqtóbe» - «Atyraý», «Qaısar» - «Tobyl», 15 shildede «Qaırat» - «Jetisý», «Ertis» - «Ordabasy» matchtary ótedi.
