Fýtbol: Chempıondar lıgasyna qatysqan barlyq komandanyń reıtıngi jarııalandy
NUR-SULTAN. QazAqparat - UEFA resmı saıty Chempıondar lıgasy tarıhynda oǵan qatysqan barlyq komandanyń reıtıngisin jarııalady, dep habarlaıdy QazAqparat tilshisi.
Reıtıngige irikteý kezeńi men fınaldyq satysyndaǵy barlyq oıyndar kórsetkishi negizge alyndy. Tizimde 600 upaımen Ispanııanyń «Real Madrıd» komandasy kósh bastap tursa, odan keıingi oryndarda Germanııanyń «Bavarııa» (476 upaı) jáne Ispanııanyń «Barselona» (447 upaı) klýbtary tur.
Bul tizimge barlyǵy 7 qazaqstandyq komanda kiredi. Olardyń arasynda atalǵan týrnırde bes márte baq synap, barlyǵy 30 oıyn (11 jeńis, 10 teń oıyn, 9 jeńilis) ótkizgen «Astana» 32 upaımen 106-orynǵa jaıǵasqan. Al 18 upaı enshilegen «Aqtóbe» - 142, 9 upaıy bar Qaraǵandynyń «Shahteri» - 226, 2 upaıy bar «Astana-1964» (burynǵy «Jeńis») - 297 orynda tur. Al Almatynyń «Qaıraty» - 371, Pavlodardyń «Ertisi» - 420, Qostanaıdyń «Tobyly» 430-orynǵa taban tiredi.
