Fýtbol: «Chelsı» Eýropa lıgasynyń jeńimpazy atandy
BAKÝ. QazAqparat - Fýtboldan ÝEFA Eýropa lıgasy fınaly máresine jetti. Anglııanyń «Chelsı» komandasy atalmysh týrnırdiń jeńimpazy atandy, dep habarlaıdy QazAqparat tilshisi.
Atalmysh fınaldyq oıyn Ázerbaıjan astanasy - Baký qalasynda ótkizildi. Sol qaladaǵy Olımpıadalyq stadıonǵa jınalǵan 70 myńǵa jýyq jankúıer qyzyqty oıyndy tamashalaýǵa múmkindik aldy. Olardyń arasynda qos komandanyń óz jankúıerleri bar. Sondaı-aq, álemniń kóptegen elderinen kelgen azamattar da az emes.
Budan buryn habarlaǵanymyzdaı, eki komanda búgingi kúnge deıin 198 márte ózara sheberlik baıqasty. Bul oıyndarda «Chelsı» 63 márte jeńiske jetse, «Arsenal» 76 ret myqty ekenin kórsetti. Al 59 kezdesýde jeńimpaz anyqtalǵan joq.
Boljam jasaýshylar búgingi kezdesýde eki komandanyń da jeńimpaz atanýǵa múmkindigi birdeı ekenin aıtty. Árıne, ony jasyl alań tórindegi sheberler tartysy anyqtap berdi. Sondaı-aq, búgingi kezdesý ÝEFA Eýropa lıgasy bombardırin anyqtady Buǵan deıin «Chelsı» shabýylshysy Olıve Jırýdiń enshisinde 10 gol bolsa, «Arsenal» fýtbolshysy Per-Emerık Obameıang 8 goldyń avtory atandy. Endeshe, olar búgingi kezdesýde sol kórsetkishin jańalaýǵa múmkindik alatyn edi. Eki oıynshy da negizgi quramda jasyl alańǵy shyqty. Birinshi kezeńde olar qarsylastar qaqpasyn dál kózdeı alǵan joq. Dese de ekinshi kezeńde Olıve Jırý 11-golyn soǵyp, atalmysh básekeniń surmergeni ekenin taǵy bir márte dáleldeı tústi.
Bıyl ÝEFA Eýropa lıgasynda jeńimpaz atanǵan komandanyń aldaǵy fýtbol maýsymynda ÝEFA Chempıondar lıgasynda baq synaýyna jol ashylady. «Arsenal» Anglııa Premer-lıgasynda besinshi oryndy qanaǵat tutty. Bul arqyly atalmysh komanda ÝEFA Chempıondar lıgasyna shyǵa almaıdy. Al «Chelsı» óz eliniń birinshiliginde úshinshi oryn aldy. Sondyqtan olar ÝEFA Chempıondar lıgasynda baq synaýǵa múmkindik týyp otyr. Degenmen ondaı múmkindikten «Arsenal» qur qaldy.
«Arsenaldyń» bas bapkeri Ýnaı Emerıdiń ÝEFA Eýropa lıgasy kýbogyn ıelený jóninen tájirıbesi mol. Ol búgingi kúnge deıin bas bapker esebinde Ispanııanyń «Sevılıa» komandasymen birge 2013/2014, 2014/2015, 2015/2016 jylǵy kezeńde qatarynan úsh márte jeńimpaz tuǵyrynan kóringen bolatyn. Degenmen bıyl «Arsenal» komandasyn sondaı jetistikke jetkize alǵan joq. Buǵan deıin mundaı tabys bıiginen kórine almaı kelgen Maýrıtsıo Sarrı esesine «Chelsıdi» osylaısha qýanyshqa keneltti.
Birinshi kezeńniń alǵashqy otyz mınýtynda «Arsenal» basym oınady . Degenmen odan keıin «Chelsı» oıyn tizginin qolǵa aldy. Ekinshi kezeń bastala salysymen olar esep ashty. Oıynnyń 49-mınýtynda «Chelsı» shabýylshysy Olıve Jırý baspen gol soǵyp, óz komandasyn alǵa shyǵardy. Al 60-mınýtynda onyń áriptesi Pedro Rodrıges esepti ústemeleı tústi. Al 65-mınýtta «Arsenal» qaqpasyna penaltı belgilendi. Ony Eden Azar múltiksiz oryndady. Budan keıin «Arsenal» oıynshylary alǵa umtyldy. Olardyń qatarynan 69-mınýtta Aleks Aıýobı esep aıyrmasyn qysqartqan edi. Dese de 72-mınýtta «Chelsı» taǵy bir gol salyp ketti. Bul gol Eden Azardyń enshisine jazyldy. Osylaısha «Chelsı» «Arsenaldan» 4:1 esebimen basym tústi.
Endi 1 maýsym kúni Ispanııanyń Madrıd qalasyndaǵy «Metropolıtano» stadıonynda ÝEFA Chempıondar lıgasynyń fınaly ótedi. Aqtyq saıysta Anglııanyń taǵy eki klýby «Lıverpýl» pen «Tottenhem Hotspýrs» komandalary kezdesedi.
