Fýtbol: Búgin el birinshiliginiń ekinshi týry ótedi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan birinshiliginiń ekinshi týry bastalady, dep habarlaıdy QazAqparat tilshisi.
Komandalar 19 jáne 20 naýryz kúnderi ózara sheberlik baıqasady. Alǵashqy kúnde úsh oıyn ótse, kelesi kúnge tórt kezdesý belgilengen.
Ekinshi týr elorda ýaqytymen 14.00-de «Taraz» jáne «Qyzyljar» komandalary arasyndaǵy kezdesýmen jalaýyn kóteredi.
Tarazdyq fýtbolshylar birinshi týrda syrt alańda Qyzylordanyń «Qaısaryn» 3:2 esebimen jeńip ketken edi. Al «Qyzyljar» Shymkentte «Ordabasymen» kezdesýi tıis bolatyn. Aýa raıynyń qolaısyzdyǵynan atalǵan kezdesý keıinge shegerildi.
Almatynyń «Qaıraty» Qyzylordada jergilikti «Qaısarmen» jasyl alańǵa shyǵady. Ótken týrda óz alańynda almatylyq ujym Taldyqorǵannyń «Jetisýyn» 2:0 esebimen tize búktirdi. Kezdesý elorda ýaqytymen 16.00-de bastalady.
Elordalyq «Astana» óz alańynda jergilikti ýaqytpen 18.00-de Aqtaýdyń «Kaspıı» klýbymen jasyl alańǵa shyǵady. «Astana» alǵashqy týrda Túrkistanda «Turanmen» 2:2, «Kaspıı» óz alańynda «Aqtóbemen» 1:1 esebimen teń tústi.
Búgingi oıyndardyń barlyǵy «Qazsport» telearnasynan tikeleı efırde kórsetiledi.
Al 20 naýryzda «Jetisý» (Taldyqorǵan) men «Turan» (Túrkistan), «Aqjaıyq» (Oral) men «Atyraý», «Shahter» (Qaraǵandy) men «Ordabasy» (Shymkent), «Aqtóbe» men «Tobyl» (Qostanaı) komandalary kezdesedi.
