Fýtbol: Búgin el birinshiligi qaıta jalǵasady
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiligi qaıta jalǵasady, dep habarlaıdy QazAqparat tilshisi.
Qazaqstandyq komandalar 4 jáne 5 sáýir kúnderi úshinshi týr oıyndaryn ótkizedi.
Atalǵan týrdyń alǵashqy kúninde elorda ýaqytymen 16.00-de óz alańynda «Atyraý» «Aqtóbeni», Aqtaýdyń «Kaspııi» Taldyqorǵannyń «Jetisýyn» qabyldaıdy. Al 18.00-de Túrkistanda jergilikti «Turan» Qyzylordanyń «Qaısarymen» sheberlik baıqasady.
5 sáýirdegi oıyndar 15.00-de Petropavlda «Qyzyljar» men Qaraǵandynyń «Shahter» komandalary kezdesýimen bastalady. Odan keıin 17.00-de Shymkentte «Ordabasy» men Oraldyń «Aqjaıyq», Almatyda «Qaırat» pen «Taraz» komandalary jasyl alańǵa shyǵady.
Atalǵan týrdy 19.00-de Qostanaıda «Tobyl» men elordalyq «Astana» klýbtary qorytyndylaıdy.
Esterińizge sala ketelik, qazaqstandyq komandalar ulttyq quramanyń irikteý satysyndaǵy oıyndaryna baılanysty azdaǵan úzilis alǵan bolatyn.
Alǵashqy eki týrdan keıin kósh basynda alty upaımen «Qaırat» komandasy keledi. Odan keıingi oryndaǵy «Astana» men «Tobyldyń» enshisinde tórt-tórt upaıdan bar.
