FÝTBOL: Brazılııa quramasynyń bas bapkeri bolǵan Skoları basqa qyzmetke taǵaıyndaldy
ASTANA. QazAqparat - Brazılııa ulttyq quramasynyń burynǵy jetekshisi Lýıs Felıpe Skoları "Gremıo" fýtbol klýbynyń bas bapkeri bolyp taǵaıyndaldy.
Bul týraly brazılııalyq "Gremıo" baspasóz qyzmetinen habarlady, dep jazady ITAR-TASS.
Aıta keteıik, Skolarıdiń Brazılııa jattyqtyrýshysy qyzmetinen ketetini fýtboldan bıylǵy álem chempıonatynyń jartylaı fınalynda ulttyq qurama Germanııa komandasynan 1:7 esebimen oısyraı jeńilgennen keıin belgili boldy. Atalmysh komanda úshinshi oryn úshin bolǵan oıynda da nıderlandyqtardan 0:3 esebimen utylyp qaldy.
Budan buryn Skoları Brazılııa quramasyn 2001-2002 jyldary basqarǵan. Ol jetekshilik etken komanda 2002 jyly Japonııa men Ońtústik Koreıada ótken ÁCh jeńiske jetken edi. Sondaı-aq ol brazılııalyq SSA, "Jýventýde", "Brazıl de Pelotas", "Gremıo Brazıl", "Gremıo", "Goıas", "Krısıýma", "Palmeıras" jáne "Krýzeıro" komandalaryna jetekshilik etti. "Ál-Shabab" (Saýd Arabııasy), "ál-Kadısııa" (Kýveıt), "Djýbılo Ivata" (Japonııa), "Chelsı" (Anglııa), "Býnedkor" (Ózbekstan) klýbtaryn da jattyqtyrdy.
