Fýtbol: Biz áli maqsatymyzǵa jetken joqpyz - Karlos Alos
ALMATY. QazAqparat - Almatylyq «Qaırat» fýtbol klýbynyń bas bapkeri Karlos Alos Gollandııanyń «AZ Alkmaaryna» qarsy ótken match qorytyndylary týraly pikir bildirdi, dep habarlaıdy "SPORTINFORM" SAA.
«Eń aldymen, komandany kelesi kezeńge shyqqanymen quttyqtaımyn. Jigitterdiń jumysyna, jankúıerlerdiń qoldaýyna kóńilim toldy. Komandam kelesi kezeńge shyǵýǵa laıyq oıyn kórsetti dep oılaımyn. Bul Qazaqstan fýtboly úshin óte mańyzdy. Biraq áli maqsatymyzǵa jetken joqpyz. Áli kóp jumys isteýge tıispiz», - dedi bapker.
Eske sala keteıik, almatylyq ujym eki oıyn nátıjesi boıynsha AZ komandasynan basym túsip, Eýropa Lıgasy irikteý kezeńiniń 3-raýndyna joldama aldy. Endi olar Chehııanyń «Sıgma» komandasymen kúsh synasady.
Úshinshi raýnd kezdesýleri 9 jáne 16 tamyz kúnderi bolady.
