Fýtbol: Bıylǵy Ulttar lıgasynyń ótetin merzimi anyqtaldy
NUR-SULTAN. QazAqparat - Fýtboldan 2020/21 jylǵy kezeńdegi Ulttar lıgasy oıyndary qaı ýaqytta bastalatyny belgili boldy, dep habarlaıdy QazAqparat tilshisi UEFA saıtyna silteme jasap.
Atalǵan doda qyrkúıek-qarasha aılary aralyǵynda ótkiziledi. Birinshi týr 3-5 qyrkúıekte bolsa, ekinshi týr 6-8 qyrkúıekte oınalady. Quramalar 10-12 qazanda úshinshi, 13-14 qazanda tórtinshi týrda sheberlik baıqasady. Al besinshi týr 14-15, altynshy týr 17-18 qarashada bolady.
Esterińizge sala ketelik, Qazaqstan quramasy atalǵan týrnırde S lıgasynyń tórtinshi tobynda synǵa túsedi. Qarsylastary - Albanııa, Belarýs jáne Lıtva quramalary.
Qazaqstandyq fýtbolshylar 2018/19 Ulttar lıgasynda D lıgasynyń birinshi tobynda Grýzııa, Latvııa jáne Andorra quramalarymen sheberlik baıqasty. Óz tobynda Grýzııany alǵa shyǵaryp, ekinshi oryndy mise tutty.
Budan buryn fýtboldan Chempıondar lıgasy men Eýropa lıgasy fınaldyq kezeńi qalaı ótkiziletini habarlandy.
