Fýtbol: Birinshiliktiń alǵashqy úsh oıyny kóp gol soǵylýymen erekshelendi
ASTANA. QazAqparat - Búgin elimizde fýtboldan Premer-lıga komandalary arasyndaǵy el birinshiligi jalaýyn kóterdi, dep habarlaıdy QazAqparat tilshisi.
Alǵashqy týrdyń birinshi kúngi úsh oıyny kóp gol soǵylýymen erekshelendi. Nebári úsh kezdesýde 12 gol soǵyldy.
Taldyqorǵan qalasynda jergilikti «Jetisý» Kókshetaýdyń «Oqjetpes» komandasyn iri eseppen jeńdi. Birinshi kezeńniń 30-mınýtyna deıin alań ıeleri úsh gol soǵyp úlgerdi. Alǵashqy gol Abylaıhan Mahambetovtiń enshisine jazylyp, ol 9-mınýtta birinshiliktiń tuńǵysh gol ıesi atandy. Al 23-mınýtta Nıkıta Naýmov mergendik kórsetti. Al 30-mınýtta «Jetisý» shabýylshysy Eljas Altynbekov qarsylastar qaqpasynan sańylaý tapty. Ońan 55-mınýtta «Oqjetpes» qatarynan Jasulan Moldaqaraev bir golmen jaýap qaıyrǵan edi. Dese de alań ıeleri qatarynan Nenad Adamovıch 79, Aıbar Jaqsylyq 86-mınýtta eki gol soqty. Osylaısha oıynda «Jetisý» «Oqjetpesten» 5:1 esebimen basym tústi.
Dál osy ýaqytta taǵy bir kezdesý Shymkentte jergilikti «Ordabasy» men Qaraǵandynyń «Shahter» komandalary arasynda órbidi. Atalmysh kezdesýde gol ekinshi kezeńniń sońǵy jıyrma mınýtynda soǵyldy. «Ordabasy» qataryna bıyl qosylǵan brazılııalyq shabýylshy Jýan Paýlo da Sılva 71 men 83-mınýttarda qanjyǵasyn maılasa, Ońtústik Afrıka Respýblıkasy elinen kelgen Maı Mahlangý 79-mınýtta qarsylastar qaqpasyn dál kózdedi. Osylaısha «Ordabasy» 3:0 esebimen jeńiske jetti.
Qostanaıda «Tobyl» óz alańynda Pavlodardyń «Ertisin» qabyldady. Bul oıyn da kóp gol soǵylýymen erekshelendi. Birinshi kezeńniń 15 jáne 35-mınýttarynda Azat Nurǵalıev eki gol soqsa, ekinshi kezeńniń 80-mınýtynda qostanaılyq shabýylshy Baýyrjan Turysbek esepti ulǵaıta tústi. Esep 3:0. «Tobyl» jeńiske jetti.
Alǵashqy týrdyń qalǵan úsh kezdesý 10 naýryz kúni ótkiziledi. Bul kúni «Qaırat» pen «Taraz», «Qaısar» men «Atyraý», «Astana» men «Aqtóbe» komandalary kezdesedi.
