Fýtbol: birinshi lıgada «Oqjetpes» ozyp kele me?
ASTANA. QazAqparat - Fýtboldan Qazaqstan chempıonatynyń birinshi lıgasynda burynǵysha Kókshetaýdyń «Oqjetpesi» kósh bastap keledi.
Senbi kúni ótken kezekti týrda «Oqjetpes» TsSKA-ny 5:2 esebimen oısyrata utyp, upaı sanyn 55-ke jetkizdi. Kókshelikterdiń premer-lıga joldamasy úshin negizgi qarsylastary da jeńiske jetti. Ekinshi oryndaǵy Shymkenttiń «Qyrany» Ekibastuzdy 3:1, úshinshi satydaǵy Aqtaýdyń «Kaspııi» Qarataýda jergilikti «Lashyndy» 1:0 esebimen jeńdi, bularda 54 jáne 51 upaıdan bar. Birinshilikten shyǵyp qalǵan Qaraǵandynyń «Gefest» komandasymen oınaýy tıis «Aqjaıyqtyń» enshisine de úsh upaı qosyldy. Batysqazaqstandyqtardyń «Kaspıımen» upaıy teń. Besinshi oryndaǵy «Astana-1964» komandasy da úmitin úze qoıǵan joq. Mergender kóshin «Jetisý-Suńqardan» Konstantın Zadorojnyı men «Qyrannan» Sanat Jumahanov 19 doppen bastap keledi.
«Oqjetpes» osylaı oq boıy ozyq kele me, ony qalǵan tórt týrdyń nátıjeleri sheshedi. Ásirese, kelesi týrda 19 qazan kúni Oralda jergilikti «Aqjaıyq» pen kókshelikter arasynda ótetin oıyn biraz nárseni ańǵartyp tastary anyq. Eger alań ıeleri jeńse, «Oqjetpestiń» qarqyny tejelip, báseke shıelenisedi. Sondaı-aq 25 qazan kúni «Oqjetpes» - «Qyran», «Vostok» (Óskemen) - «Aqjaıyq», 2 qarashada «Qyran» - «Vostok», «Aqjaıyq» - «Astana-1964», 8 qarashadaǵy eń sońǵy týrda «Jetisý-Suńqar» - «Aqjaıyq», «Astana-1964» - «Qyran», «Oqjetpes» - «Kaspıı» kezdesýleri tartysty óteri sózsiz.
