Fýtbol: Birinshi lıgada ekinshi aınalym oıyndary bastaldy
NUR-SULTAN. QazAqparat – Fýtboldan birinshi lıga komandalary ekinshi aınalym oıyndaryn bastady, dep habarlaıdy QazAqparat tilshisi.
Birinshi aınalymnan keıin biraz tynyǵyp alǵan klýbtar óz aldarynda turǵan mindetter údesinen kórinýge taǵy kiristi.
Týrnır kestesinde kósh basynda kele jatqan «Altaı» óz alańynda «Shahter-Bolat» komandasyn 5:0 esebimen tas-talqan etip jeńdi.
Osylaısha 35 upaı jınaǵan semeılikter premer-lıga joldamasynan basty úmitker ekendikterin taǵy bir dáleldedi.
Aqtaýda «Maqtaaraldy» 1:0 esebimen tize búktirgen «Kaspıı» 30 upaımen ekinshi orynǵa kóterildi.
Premer-lıgadan úmitker «Qyzyljar» (Petropavl) klýby Almatyda «Qaırat-Jastardan» 0:2 esebimen utylyp qaldy.
Sol sekildi Oraldyń «Aqjaıyǵy» óz alańynda «Jetisý B» komandasyn uta almaı, pushaıman boldy – 1:1.
«Qyzyljar» 28 upaımen úshinshi, oraldyqtar (26 upaı) tórtinshi orynda keledi.
Besinshi oryndaǵy «Akademııa Ońtústik» komandasy (25 upaı) óz alańynda «Ekibastuzdyń» meselin qaıyrdy – 2:1. Al «Baıqońyr» «Qyrandy» qapy qaldyrdy – 3:2. «Aqtóbe-Jas» pen «Astana M» teń tarqasty – 1:1.
Sóıtip ekinshi aınalymnyń alǵashqy matchtarynyń ózi-aq kóshbasshy komandalarǵa upaı jınaý ońaıǵa túspeıtinin kórsetti.
XV týr oıyndary 2-4 tamyz aralyǵynda ótedi. Onda «Shahter-Bolat» - «Akademııa Ońtústik», «Jetisý B» - «Kaspıı», «Maqtaaral» - «Altaı», «Ekibastuz» - «Baıqońyr», «Qyran» - «Qaırat-Jastar», «Qyzyljar» - «Astana M», «Aqtóbe-Jas» - «Aqjaıyq» komandalary ózara synǵa túsedi.
