Fýtbol: birinshi lıgada «Altaı» klýby jekedara kósh bastap keledi
ORAL. QazAqparat - Fýtboldan birinshi lıga komandalary arasynda toǵyzynshy týrdyń ortalyq matchy Oralda ótti, dep habarlaıdy QazAqparat tilshisi.
P.Atoıan atyndaǵy stadıonda premer-lıgaǵa shyǵýdan úmitker «Aqjaıyq» pen «Kaspıı» (Aqtaý) komandalary kúsh synasty.
Qos klýb úshin asa mańyzdy oıynda birinshi bolyp 37-mınýtta aqtaýlyq jas fýtbolshy Rýslan Janysbekov esep ashty. Budan keıin oraldyq maman Artýr Avakıantstyń shákirtteri tarazy basyn teńestirý úshin bar kúshin saldy. Ekinshi taımda alańǵa shyqqan Sergeı Shaff 67-mınýtta qonaqtardyń qaqpasyn dál kózdedi. Sodan soń da eki komanda jeńis úshin qanshama tyrysqanymen, esep ózgermedi.
Osylaısha tartysty match 1:1 esebimen teń aıaqtaldy.
Birinshi lıgada kósh bastap kele jatqan «Altaı» komandasy «Astana Arena» stadıonynda jergilikti «Astana M» klýbymen sheberlik baıqasty. Bul oıynda reseılik jartylaı qorǵaýshy Sergeı Dýdkın qos goldyń avtory atanyp, komandasyna jeńis áperdi. Alań ıelerinen Mádı Jaqypbaev bir golmen ǵana jaýap berdi.
Osylaısha bul týrdan keıin 23 upaı jınaǵan «Altaı» týrnır kestesindegi jaǵdaıyn nyǵaıta tústi. Shyǵysqazaqstandyq klýb - chempıonat barysynda jeńilis tappaǵan birden-bir komanda. «Kaspıı» 18 upaımen ekinshi orynda keledi.
Almatyda «Akademııa Ońtústikti» 1:0 esebimen utqan «Qaırat-Jastar» komandasy 17 upaımen úshinshi satyǵa kóterildi. Petropavlda «Shahter-Bolatty» 2:0 esebimen tize búktirgen «Qyzyljar SK» 16 upaı jınap, «Aqjaıyqty» qýyp jetti. Shymkentte «Qyran» «Ekibastuzdy» utsa, «Aqtóbe-Jas» óz alańynda «Maqtaaralǵa» 1:2 esebimen ese jiberdi. Toǵyzynshy týr 1 maýsym kúni «Baıqońyr» men «Jetisý B» komandalarynyń matchymen aıaqtalady.
Kelesi týr 16 maýsym kúni bolmaq. Munda ortalyq kezdesý «Altaı» - «Aqjaıyq» komandalary arasynda ótedi.
