Fýtbol: Birinshi lıgada «Altaı» eshkimge des berer emes
ORAL. QazAqparat - Fýtboldan birinshi lıga komandalary arasynda HІ týr nátıjeleri belgili boldy, dep habarlaıdy QazAqparat tilshisi.
Osy týrdaǵy ortalyq kezdesýlerdiń biri Oral qalasyndaǵy P.Atoıan atyndaǵy stadıonda ótti. Ótken týrda syrt alańda «Altaıdan» 0:2 esebimen utylyp qalǵan «Aqjaıyq» úshinshi orynda kele jatqan «Akademııa Ońtústik» komandasyn qabyldady.
Oraldyq maman Artýr Avakıantstyń shákirtteri birden oıyn tizginin qolǵa aldy. Bul óz jemisin berdi de. Birinshi taım sońyna taman batysqazaqstandyq jas fýtbolshy Danııl Kochnev esep ashty.
Ekinshi taım teń jaǵdaıda ótti. Oıyn aıaqtalýǵa bes mınýt qalǵanda, qonaqtar tarazy basyn teńestirdi. Degenmen «Aqjaıyqtyń» tisqaqqan oıynshylarynyń biri, horvatııalyq Denıs Glavına tájirıbeli qorǵaýshy Rýslan Qaıyrovtyń tamasha pasynan keıin óz komandasyna jeńis áperdi - 2:1.
Ekinshi mańyzdy match Petropavlda ótti. Jergilikti «Qyzyljar» Aqtaýdyń «Kaspııin» qabyldap, 1:0 esebimen jeńiske jetip, týrnır kestesinde 22 upaımen ekinshi orynǵa kóterildi.
Al Aqtóbede «Aqtóbe-Jasty» 2:0 esebimen tize búktirgen «Altaı» komandasy 29 upaı jınap, qalǵan klýbtardan uzaı tústi. Semeılikter toǵyz matchta jeńip, eki kezdesýde teń oınap, áli kúnge jeńilistiń aşy dámin tatqan joq.
«Kaspıı» 21 upaımen úzdik úshtikti túıindese, óz alańynda «Jetisý B» komandasyn 2:0 esebimen qapy qaldyrǵan Almatynyń «Qaırat-Jastary» (20 upaı) tórtinshi orynǵa kóterildi. «Akademık Ońtústik» pen «Aqjaıyq» 19 upaımen besinshi-altynshy oryndardy bólisýde.
Osylaısha premer-lıga joldamalary úshin báseke qyza tústi deýge bolady.
29 maýsym kúni bolatyn HІІ týrda ortalyq match «Altaı» men «Qyzyljar» komandalary arasynda ótedi. «Kaspıı» «Qyrandy» qabyldasa, oraldyqtar úshin syrt alańda «Baıqońyrdan» upaı alý ońaıǵa túspeıtini anyq. Óıtkeni «Baıqońyr» sońǵy úsh oıynda qatarynan jeńiske jetip, sonyń nátıjesinde 16 upaı jınap, úzdik alty komandaǵa jaqyndaı tústi.
