Fýtbol: Birinshi lıga oıyndary márege jetti
ORAL. QazAqparat – Birinshi lıga komandalary arasynda Qazaqstan chempıonaty márege jetti, dep habarlaıdy QazAqparat tilshisi.
Bıyl koronavırýs indetine baılanysty komandalar eki topqa bólinip, 15 qyrkúıekten bastap aı jarym ýaqyt qana oınaýmen shekteldi.
Sońǵy týrda «Altaıǵa» 0:2 esebimen ese jibergenine qaramastan, birinshi topta «Aqtóbe» komandasy 29 upaı jınap, jeńimpaz atandy.
Ekinshi topta «Atyraý» komandasy 27 upaımen kósh basynan kórindi. Aqtóbelikter sııaqty premer-lıga joldamasyna kúni buryn qol jetkizgen atyraýlyqtar qorytyndy oıynda Oraldyń «Aqjaıyq» komandasymen alańǵa shyqty. Bul matchta oraldyqtar 3:2 esebimen jeńiske jetip, óz tobynda 23 upaımen ekinshi orynǵa kóterildi. Elordalyq SDıÝSShOR №8 men taldyqorǵandyq «Jetisý B» men 2:2 esebimen teń tarqasyp, sáıkesinshe úshinshi-tórtinshi satyda qalyp qoıdy.
Osylaısha óz toptarynda úzdik shyqqan «Aqtóbe» men «Atyraý» komandalary bir jyldyq úzilisten keıin premer-lıgaǵa qaıta oraldy. Al aldyna osyndaı mindet qoıǵan «Aqjaıyq» klýby bul údeden kórine almady. Endi kelesi jylǵa úmit artýǵa týra keledi.
Eske sala keteıik, budan buryn premer-lıgada «Qaırattyń» «Astanadan» basym túskenin jazǵan bolatynbyz.
