Fýtbol: birinshi lıga kóshbasshylary arasyndaǵy tartys shıelenise tústi
ORAL. QazAqparat - Fýtboldan birinshi lıganyń kezekti týrynan keıin kóshbasshy komandalar arasyndaǵy tartys shıelenise tústi, dep habarlaıdy QazAqparat tilshisi.
Osyǵan deıin kósh bastap kele jatqan Petropavldyń «Qyzyljary» óz alańynda Shyǵys Qazaqstannyń «Altaıymen» teń oınady - 0:0.
Ekinshi oryndaǵy «Kaspııdiń» (Aqtaý) «Qyzyljardy» qýyp jetýge múmkindigi bar edi. Alaıda olar syrt alańda kútpegen jerden «Qyranǵa» iri eseppen ese jiberdi - 1:5.
Oraldyń «Aqjaıyǵy» P.Atoıan atyndaǵy stadıonda «Baıqońyrdy» oısyrata utty - 5:0. Alań ıelerinen Rýslan Haırov qos goldyń avtory atansa, Naýryzbek Jagorov, Sergeı Basov, Roman Pavınıch qarsylas qaqpasyna bir-bir doptan engizdi.
Osylaısha petropavldyqtardyń esebinde 52 upaı bolsa, aqtaýlyqtardyń olardan eki upaıy kem. Oraldyqtar «Altaıdy» qýyp jetti, bulardyń qorjynynda 49 upaıdan bar.
Premer-lıga joldamalary taǵdyryn qalǵan eki týr oıyndarynyń nátıjesi sheshedi. Alǵashqy eki oryndy ıelengen qos komanda premer-lıgaǵa birden joldama alady. Úzdik úshtikti túıindegen komanda premer-lıgada onynshy oryn alǵan klýbpen taǵy bir joldamany sarapqa salady.
