Fýtbol: Birinshi lıga alǵashqy aınalymdy qorytyndylady
ORAL. QazAqparat - Fýtboldan birinshi lıga komandalary HІІІ týrdyń oıyndaryn ótkizdi, dep habarlaıdy QazAqparat tilshisi.
Birinshi aınalymnyń sońǵy týrynda Oraldyń «Aqjaıyǵy» P.Atoıan atyndaǵy stadıonda Almatynyń «Qaırat-Jastaryn» qabyldady.
Bul match Artýr Avakıants jattyqtyratyn batysqazaqstandyqtarǵa ońaıǵa túsken joq. Onyń ústine oraldyqtar óz qaqpasyna birinshi bolyp gol ótkizip aldy. Degenmen namysqa tyrysqan alań ıeleri Oral fýtbolynyń túlegi Vladımır Pokatılov pen ýkraınalyq legıoner Sergeı Basovtyń soqqan goldary arqasynda jeńiske jetti - 2:1.
Osy týrda kósh bastaýshy komandalardyń qaı-qaısysy da súringen joq, qaıta qarsylastaryn iri eseppen tize búktirdi. «Altaı» syrt alańda «Qyrandy» 4:1 esebimen qapy qaldyrsa, «Kaspıı» de «Ekibastuzdy» qınalmaı utty - 4:1. «Qyzyljar» Petropavlda «Akademııa Ońtústik» komandasyna esh múmkindik qaldyrmady - 5:0.
Osylaısha premer-lıga joldamasy úshin talasatyn komandalar belgili bolyp qaldy. Ótken týrda óz alańynda negizgi qarsylasy «Qyzyljardan» utylyp, bıylǵy maýsymda alǵash ret jeńilistiń aşy dámin tatsa da, «Altaı» 32 upaımen týrnır kestesinde jekedara kósh bastap keledi. «Qyzyljar» 28 upaımen ekinshi, «Kaspıı» (27 upaı) úshinshi, «Aqjaıyq» (25 upaı) tórtinshi orynda tur. Odan keıingi satydaǵy «Akademııa Ońtústik», «Qaırat-Jastar», «Baıqońyr» komandalarynyń olarmen taıtalasa qoıýy qıyndaý. Degenmen bul ekinshi aınalymda básekelestik báseńdeıdi degen sóz emes. Mamandar sońǵy jyldary birinshi lıganyń deńgeıi kóterilgenin aıtyp júr. Demek, ne bel, ne belbeý ketetin tartysty matchtar alda.
Ekinshi aınalym oıyndary biraz úzilisten keıin, 27 shilde kúni bastalady.
