Fýtbol: «Barselona» óz alańynda «Realdan» jeńilip qaldy
NUR-SULTAN. QazAqparat – Ispanııa chempıonatynyń 7-týrynda «Barselona» óz alańynda Madrıdtiń «Real» komandasyn qabyldady, dep habarlaıdy QazAqparat tilshisi.
Búkil álem jankúıerleriniń nazaryn aýdarǵan 2020-2021 jylǵy birinshiliktegi alǵashqy «el klassıko» kezdesýi qos komanda úshin de mańyzdy edi.
Osynyń aldyndaǵy týrda «Barselona» «Hetafı» komandasynan 0:1 esebimen jeńilis tapsa, «Real» óz alańynda kútpegen jerden chempıonatqa bıyl qosylǵan «Kadıske» (0:1) ese jibergen edi. Sodan keıin frantsııalyq ataqty fýtbolshy ári bapker Zınedın Zıdannyń shákirtteri Chempıondar lıgasynda taǵy da óz alańynda «Shahterden» (Donetsk) 2:3 esebimen utylyp qaldy. Eger jýyq arada nátıje shyǵarmasa, Z.Zıdannyń basyna bult úıirilgendeı bolǵan.
Al ataq-dárejesi eshkimnen kem emes nıderlandylyq Ronald Kýman óz komandasyn bas bapker retinde «Realmen» kezdesýge alǵash ret alyp shyqty.
Matchty qonaqtar óte sátti bastap, 5-mınýtta Karım Benzemanyń pasynan keıin Federıko Valverde esep ashty.
Arada úsh mınýt ótkende Jordı Albanyń pasyn paıdalanǵan Ansý Fatı tarazy basyn teńestirdi.
Osylaısha 17 jastaǵy Ansý Fatı «el klassıko» tarıhynda gol soqqan eń jas oıynshy atandy. Ol 18 jasynda gol soqqan «Real» shabýylshysy Raýldyń rekordyn jańartty.
Ekinshi taımda Kleman Langle oıyn tártibin buzdy degen sebeppen tóreshi belgilegen penaltıdi 63-mınýtta Serhıo Ramos dál oryndady. 90-mınýtta oıynnyń ekinshi kezeńinde alańǵa shyqqan Lýka Modrıch match núktesin qoıyp, esepti 3:1-ge jetkizdi.
Sóıtip 13 upaı jınaǵan «Real» komandasy chempıonat kestesinde birinshi orynǵa kóterilse, «Barselona» (7 upaı) 10-satyda qalyp qoıdy.
