Fýtbol bapkerlerine balalardyń psıhologııasy men oıynnyń qyr-syry úıretiledi
ASTANA. QazAqparat - Shilde aıynda Astanada fýtbol jattyqtyrýshylary úshin daıyndyq kýrsy ótedi, dep habarlaıdy QazAqparat Astana fýtbol federatsııasyna silteme jasap.
Oqytý kýrsy 10-15 shilde aralyǵynda ótedi. Bolashaq bapkerler «Balalar fýtbolynyń erekshelikteri», «Balalar psıhologııasy», «Balalar fýtbolyndaǵy medıtsına», «Fýtboldyń jalpy erejesi» syndy taqyryptar boıynsha kásipqoı mamandardan dáris alyp, bilimderin jetildiretin bolady.
Astana fýtbol federatsııasynyń menedjeri Danat Muhametǵalıevtiń aıtýynsha, Astana fýtbol federatsııasy jattyqtyrýshylardy oqytý kýrstaryn sońǵy eki jyldyń ishinde úsh ret ótkizgen. Osy ýaqytqa deıin barlyǵy 82 bapkerge «S» sanatyndaǵy sertıfıkattar berildi.
«Sońǵy kýrsta jattyqtyrýshy bolýǵa nıet bildirgenderdiń sany tipten kóp bolyp, jartysyn keri qaıtarýǵa májbúr boldyq», - deıdi ol.
«S» sanatyndaǵy sertıfıkat bapkerlerge áýesqoı jáne buqaralyq fýtbol komandalarynda, sonymen qatar balalar fýtbolynda bapker bolyp jumys jasaýǵa múmkindik beredi.
