Fýtbol: Baktıer Zaınýtdınov taǵy da kózge tústi
NUR-SULTAN. QazAqparat – Qazaqstan ulttyq quramasynyń múshesi Baktıer Zaınýtdınov Reseı chempıonatynyń 18-týrynda máskeýlik TsSKA quramynda alańǵa shyqty, dep habarlaıdy QazAqparat tilshisi.
Máskeýlik klýb buǵan deıingi úsh týrda eki oıynda teń oınap, bireýinde jeńilis taýyp, týrnır kestesinde úshinshi orynǵa syrǵyp ketken bolatyn.
Sondyqtan Máskeý qalasynda «Ýral» komandasymen (Ekaterınbýrg) báseke TsSKA men onyń bapkeri Vıktor Goncharenko úshin asa mańyzdy edi. Óıtkeni Eýropa lıgasynda da sátsiz óner kórsetkennen keıin V.Goncharenkoǵa ornynan bosap qalý qaýpi tóngen-di.
Oıynǵa birden aralasqan B.Zaınýtdınov bul joly shabýyl shebinde kóbirek kórindi. 4-mınýtta Ilıa Shkýrınniń pasynan keıin Baktıer tepken dopty «Ýraldyń» qaqpashysy Ilıa Pomazýn qaqshyp aldy. Sálden keıin qazaqstandyq fýtbolshy tártip buzyp, eskertý alyp qaldy. Endi ol 17 jeltoqsanda Rostovta óziniń burynǵy komandasymen ótetin matchqa qatyspaıdy.
Degenmen kóp uzamaı B.Zaınýtdınov nátıjeli oıynymen kózge tústi. 12-mınýtta oń qaptaldan Baktıerdiń áýeletip, ádemi bergen pasynan keıin I.Shkýrın esep ashty – 1:0.
Birinshi taımda qonaqtar da qarap qalmady. 31-mınýtta Andreı Egorychev tarazy basyn teńestirip ketti.
Ekinshi kezeń «Ýral» úshin sátsiz bastaldy. Tájirıbeli shabýylshy Pavel Pogrebnıak eskertý alǵannan keıin qarap turmaı, tóreshige doq kórsetemin dep, alańnan qýyldy. Ol az bolǵandaı, qorǵaýshy Alekseı Gerasımovtyń qolyna dop tıip, 11 metrlik aıyp dobyn 61-mınýtta Nıkola Vlashıch dál oryndady – 2:1. 63-mınýtta B.Zaınýtdınovty Fedor Chalov almastyrdy.
Alań ıeleri bir fýtbolshysy kem «Ýraldy» asa qınalmaı jeńetindeı kóringen. Alaıda 89-mınýtta Igor Kalının baspen toǵyzdyqty dál kózdedi. Ol matchtyń úzdik oıynshysy atandy.
Kezdesý sońynda dóreki oınaǵan I.Shkýrınge de qyzyl qaǵaz kórsetildi.
Osylaısha match 2:2 esebimen teń aıaqtaldy. Sóıtip óz alańynda qarsylasyn uta almaı, múmkindigin taǵy da múlt jibergen TsSKA 34 upaımen úshinshi orynda qaldy. Máskeýlikter túrli týrnırde jeti oıyn qatarynan jeńiske jete almaı keledi.
Mamandar B.Zaınýtdınovtyń birinshi taımdaǵy ónerin joǵary baǵalady. Jalpy, bıyl máskeýlik klýbqa alynǵan oıynshylardyń ishinde transferlik quny jóninen eń arzany bola tursa da, 22 jastaǵy Baktıer ámbebap fýtbolshyǵa aınalyp keledi. Buryn jartylaı qorǵanys shebinde ǵana oıqastaǵan ony TsSKA bapkerleri birese sol, birese oń qaptaldaǵy qorǵanysta synap kórdi.
Eske sala keteıik, budan buryn qazaqstandyq oıynshynyń úzdik gol avtory atanǵanyn jazǵan bolatynbyz.
