Fýtbol: «Atyraý» qatarynan úshinshi márte jeńildi
NUR-SULTAN. QazAqparat - Búgin fýtboldan Premer-lıga komandalary arasyndaǵy el birinshiliginiń alǵashqy úsh oıyny ótti, dep habarlaıdy QazAqparat tilshisi.
«Atyraý» bıylǵy dop dodasynda qatarynan úshinshi márte jeńilistiń aşy dámin tatty. Bul joly «Aqtóbe» komandasyna 1:3 esebimen ese jiberdi. Oıynnyń 33-mınýtynda alań ıeleri sapynan Rafael Ospanov esep ashqan edi. Odan keıin aqtóbelik klýb qatarynan Maksım Fedın 45, Erveın Mýkam 73, Rıfat Nurmuǵamet 82-mınýttarda mergendik tanytty.
Aqtaýdyń «Kaspııi» óz alańynda Taldyqorǵannyń «Jetisýyn» 2:0 esebimen súrindirdi. Osylaısha aqtaýlyq fýtbolshylar birinshiliktegi alǵashqy jeńisine qol jetkizdi. Olardyń qatarynan Ýadjı Salı 12-mınýtta penaltıden, Rýslan Mıngazov 82-mınýtta gol soqty.
Búgingi oıyndardy Túrkistanda jergilikti «Turan» men Qyzylordanyń «Qaısar» komandalary túıindedi. Alań ıeleri qatarynan 90-mınýtta Temirlan Erlanov esep ashsa, oǵan arada bir mınýt ótkende «Qaısar» oıynshysy Arman Keńesov bir golmen jaýap qaıyrdy. Oıyn 1:1 esebimen teń aıaqtaldy.
Úshinshi týrdaǵy qalǵan kezdesý 5 naýryzda ótkiziledi. Bul kúni 15.00-de Petropavlda «Qyzyljar» men Qaraǵandynyń «Shahter» komandalary kezdesedi. Odan keıin 17.00-de Shymkentte «Ordabasy» men Oraldyń «Aqjaıyq», Almatyda «Qaırat» pen «Taraz» komandalary jasyl alańǵa shyǵady.
