Fýtbol: «Astananyń» eýrokýboktyń úshinshi satysyndaǵy yqtımal qarsylastary anyqtaldy

ASTANA. QazAqparat - Qazaqstandyq «Astana» komandasynyń UEFA Chempıondar lıgasy úshinshi satysyndaǵy yqtımal qarsylasy anyqtaldy, dep habarlaıdy QazAqparat tilshisi.

Qazaqstandyq klýb ekinshi irikteý satysynda Horvatııanyń «Dınamo» (Zagreb) komandasyn jeńgen jaǵdaıda úshinshi irikteý satysynda Grekııanyń AEK komandasymen kezdesedi.

Al «Dınamoǵa» ese jibergen jaǵdaıda UEFA Eýropa lıgasy úshinshi irikteý satysynda «Lýdogorets» (Bolgarııa) / «Olımpııa» (Slovenııa) jubynyń jeńilgen komandasymen sheberlik baıqasady.

Aıta ketsek, elordalyq komanda qazirge deıin birinshi irikteý satysynda Grýzııanyń «Dınamo» (Tbılısı) komandasyn (2:1, 1:1) qapy qaldyryp ketti.

Endi shildeniń 25-nen 26-na qaraǵan túni jáne 2 tamyzda Horvatııanyń «Dınamo» (Zagreb) klýbymen oınaıdy.

Sondaı-aq, búgin qazaqstandyq «Ordabasy», «Aqtóbe» jáne «Tobyl» komandalarynyń UEFA Konferentsııa lıgasy úshinshi irikteý satysyndaǵy yqtımal qarsylastary anyqtalady.