Fýtbol: «Astanaǵa» tórt oıynshy qaıtyp oraldy
NUR-SULTAN. QazAqparat – El chempıony «Astanaǵa» Qazaqstan quramasynyń tórt oıynshysy qaıtyp oraldy, dep habarlaıdy QazAqparat tilshisi.
Qaqpashy Dmıtrıı Nepogodov, qorǵaýshylar Sergeı Malyı men Marat Bystrov jáne shabýylshy Alekseı Şetkınniń shymkenttik «Ordabasyǵa» jalǵa berý ýaqyty bitkendikten, klýbqa qaıta qosyldy.
Ótken maýsymda S.Malyı «Ordabasy» quramynda 29 oıyn ótkizip, bir gol soqty. Onyń elordalyq klýbpen kelisimsharty aldaǵy jazda bitedi.
A.Şetkın shymkenttiktermen birge 22 matchta qarsylastar qaqpasyna jeti gol engizdi. 23 kezdesý ótkizgen M.Bystrov ta «Ordabasynyń» negizgi fýtbolshysyna aınalǵan bolatyn. Bul ekeýiniń «Astanamen» bir jylǵa kelisimsharty bar.
Shymkenttik komanda qaqpasyn 29 márte qorǵaǵan D.Nepogodov premer-lıgada ótken jylǵy maýsymnyń úzdik qaqpashysy atandy.
«Astana» klýbynyń bapkerleri Portýgalııada ótetin oqý-jattyǵý jıynyna ketkenshe kelgen tórt oıynshynyń qaısysy komandamen qalatynyn, qaısysy qaıtadan jalǵa beriletinin sheshýi tıis.
Sonymen qatar elordalyq klýbqa Qyzylordanyń «Qaısarynan» Armenııa quramasynyń shabýylshysy Tıgran Barsegıan kelmekshi.
«Astana» fýtbol klýbynan túsken málimetke qaraǵanda, elordalyqtar Portýgalııadaǵy jıyn barysynda Anglııa chempıonshıpiniń ókili «Brentford» klýbymen 25 qańtarda joldastyq kezdesý ótkizedi. Londondyqtar qazirgi kezde úshinshi orynda keledi, ıaǵnı aǵylshyn premer-lıgasyna ótýden úmitkerlerdiń biri.
Eske sala keteıik, budan buryn Qazaqstan quramasynda oınaǵan taǵy eki fýtbolshynyń «Astanadan» ketkenin jazǵan bolatynbyz.
