Fýtbol: «Astana» tórt oıynda qatarynan jeńiske jetti
NUR-SULTAN. QazAqparat - Búgin elordalyq «Astana» óz alańynda «Atyraý» komandasyn qabyldady. Bul fýtboldan Premer-lıga komandalary arasyndaǵy Qazaqstan birinshiliginiń aldyn-ala ótkizilip jatqan 18-týr oıyny bolatyn, dep habarlaıdy QazAqparat tilshisi.
«Astana» bıylǵy birinshilikti sátti bastady. Buǵan deıin úsh kezdesýde upaıdan shashaý shyǵarǵan joq. Aldymen 10 naýryzda óz alańynda «Aqtóbeni» 4:1 esebimen jeńse, odan keıin 15 naýryzda elordada Kókshetaýdyń «Oqjetpesin» 2:1 esebimen tize búktirdi. Al 31 naýryzda Taldyqorǵanda jergilikti «Jetisýdan» 2:1 esebimen basym tústi. Nátıjesinde úsh týrda upaı joǵaltpaǵan «Tobyl» men «Qaırattyń» qataryna qosyldy.
«Atyraý» komandasy alǵashqy týrda Qyzylordada jergilikti «Qaısardy» 1:0 esebimen jeńdi. Odan keıin «Ertiske» 1:3, «Tarazǵa» 0:2 esebimen jol berdi. Qazir týrnır kestesinde toǵyzynshy orynda keledi.
Búgingi kezdesýde «Astana» komandasynyń basym ekeni baıqalyp turdy. Oıyn tizgini negizinen alań ıeleriniń qolynda boldy. Alǵashqy gol 17-mınýtta soǵyldy. Astanalyq Marın Tomasovtyń alystan tepken doby «Atyraý» qaqpasynyń jaqtaýyna tıip keıin serpildi. Oǵan elordalyq shabýylshy Djýnıor Kabananga birinshi jetip, golǵa aınaldyryp úlgerdi. Al ekinshi goldy 40-mınýtta Dorın Rotarıý óz enshisine jazdy.
Ekinshi kezeńde de «Astana» qarqynyn báseńdetken joq. Kezekti shabýyldyń birinde 50-mınýtta Abzal Beısebekov esepti ulǵaıta tústi. Oıynnyń 83-mınýtynda «Atyraý» esep aıyrmasyn qysqarta aldy. Áriptesi Rodınovtyń bergen pasyn Rınat Jumatov golǵa aınaldyrdy. Kezdesýde «Astana» 3:1 esebimen jeńdi. Osylaısha olar tórtinshi oıyn qatarynan jeńiske jetti. Týrnır kestesinde elordalyq klýb jeke-dara kósh basyna shyqty.
Endi tórtinshi týr oıyndary 6 jáne 7 sáýir kúnderi bolady. 6 sáýirde «Tobyl» men «Aqtóbe», «Ordabasy» men «Jetisý», «Qaısar» men «Astana», «Qaırat» pen «Oqjetpes», «Ertis» pen «Taraz» komandalary kezdesse, 7 sáýirde «Atyraý» men «Shahter» klýbtary sheberlik baıqasady.
