Fýtbol: «Astana» sońǵy mınýttarda «Ordabasydan» jeńisti julyp aldy
ASTANA. QazAqparat - Búgin el birinshiliginiń HVІ týrynda «Astana» óz alańynda Shymkenttiń «Ordabasy» komandasyn qabyldady, dep habarlaıdy QazAqparat tilshisi.
«Astana Arena» stadıonynda ótken asa tartysty oıyn jankúıerlerge goldyń kóptigimen keremet qýanysh syılady.
Shymkenttikter birinshi bolyp esep ashty. 7-mınýtta Marın Anıchıch shabýylshy Ivan Nagaevty shalyp jyǵyp, 11 metrlik núkteden senegaldyq jartylaı qorǵaýshy Abdýllaı Dıakate múlt ketken joq.
Ótken týrda «Aqjaıyqtyń» qaqpasyna jeńis golyn soqqan ózbekstandyq I.Nagaev bul joly birden oıynǵa kiriskenimen, kóp uzamaı jaraqat alyp qaldy. Onyń ornyna grýzııalyq Djaba Djıgaýrı shyqty.
Birinshi taımda Qazaqstan ulttyq quramasynyń múshesi Erkebulan Tuńǵyshbaev Nenad Erıchpen jekedara shyǵyp, keremet múmkindigin paıdalana almady. Onyń soqqysyn qorǵaýshy Evgenıı Postnıkov qaıtaryp úlgerdi. Esep 2:0 bolǵanda, oıynnyń qalaı órbıtini belgisiz edi.
34-mınýtta oń qanattan berilgen pastan keıin Roman Mýrtazaev esepti teńestirdi. Arada eki mınýt óter-ótpeste shymkenttik qorǵaýshynyń qateliginen keıin ol qos goldyń avtory atandy. Taım sońynda Dmıtrıı Shomko qos birdeı oıynshyny aldap ótip, tamasha gol soǵyp, esepti 3:1-ge jetkizdi.
Ekinshi taımda 54-mınýtta «Ordabasydan» argentınalyq Fakýndo Bertolo baspen qaqpany dál kózdedi.
Buryn «Qaıratty» jattyqtyrǵan, jýyrda shymkenttik komandanyń tizginin ustaǵan grýzııalyq maman Kahaber Tshadadze tyńnan reseılik shabýylshy Nıkıta Bocharovty qosty. Bul ádis óz jemisin berip, 82-mınýtta N.Bocharov tarazy basyn teńestirdi - 3:3.
Tartysqa toly báseke teń aıaqtalatyndaı kóringen. Degenmen «Astanany» jattyqtyrǵanyna kóp bola qoımaǵan ýkraınalyq maman Roman Grıgorchýk ta jeńis úshin baryn salyp, Alekseı Şetkındi shyǵardy. 91-mınýtta A.Şetkın mergendik tanytsa, eki mınýttan keıin serbııalyq Djordje Despotovıch esepti 5:3-ke jetkizdi.
Osylaısha bul utystan keıin elordalyqtar 46 upaı jınap, «Qaırattan» birshama uzap ketti. Almatylyqtardyń 35 upaıy bolǵanymen, olar úsh kezdesýdi kem ótkizdi.
Aıta keteıik, erteń «Ertis» - «Jetisý», «Qaısar» - «Qaırat», «Aqjaıyq» - «Tobyl», «Aqtóbe» - «Shahter», «Atyraý» - «Qyzyljar» oıyndary ótedi.
