Fýtbol: «Astana» Reseı chempıony «Spartakty» utty
ASTANA. QazAqparat - Jańa maýsymǵa daıyndalyp jatqan «Astana» komandasy Máskeýdiń «Spartagymen» joldastyq kezdesý ótkizip, 3:2 esebimen jeńiske jetti, dep habarlaıdy «QazAqparat» tilshisi.
Birikken Arab Ámirlikterinde ótken oıynda bolgarııalyq maman Stanımır Stoılovtyń shákirtteri birinshi bolyp esep ashty. 19-mınýtta komandaǵa jańadan qosylǵan serbııalyq jartylaı qorǵaýshy Marko Stanoevıch mergendik tanytty. 33-mınýtta sol qaptaldan alǵa umtylǵan Jýnıor Kabananganyń pasynan keıin horvatııalyq Marın Tomasov esepti 2:0-ge jetkizdi.
Joldastyq kezdesý bolǵannan keıin shama-sharqyn baıqap kórý úshin oıynshylardy almastyra berýge bolady. Sondyqtan match barysynda komandalar quramynda ózgeris az bolǵan joq.
Ekinshi taımda Reseı chempıony esepti ózgertýge tyrysyp baqty. Degenmen elordalyqtar óz múmkindigin jaqsy paıdalanyp, ekinshi taımda alańǵa shyqqan serbııalyq shabýylshy Djordje Despotovıch úshinshi goldy soqty. Budan keıin astanalyq qorǵaýshy Igor Shıtov óz aıyp alańynda "Spartaktyń" quramynda alańǵa shyqqan Pedro Roshany shalyp jyqty. Gollandııalyyq Kvınsı Promeske 11 metrlik núkteden ekinshi taımda Nenad Erıchtiń ornyna qaqpaǵa turǵan Stanıslav Pavlovty aldaý qıynǵa túsken joq. Kezdesý aıaqtalýǵa eki mınýttaı ýaqyt qalǵanda, Kabo-Verde eliniń ókili Ze Lýıshtan pas alǵan brazılııalyq Pedro Rosha S.Pavlovpen jekedara shyǵyp, esepti qysqartty.
Osylaısha, elordalyqtar belgili klýbty 3:2 esebimen tize búktirdi.
Aıta keteıik, ótken jyly Qazaqstan tarıhynda tuńǵysh ret Eýropa lıgasynyń pleı-off básekesine joldama alǵan astanalyqtar bıylǵy kezdesýlerin jyldaǵydan erterek, aldaǵy aqpan aıynda ótkizedi. 15 aqpan kúni «Astana» óz alańynda «Sportıng» (Lıssabon) komandasyn qabyldasa, qarymta kezdesý 22 aqpanda Portýgalııada ótedi. Sondyqtan bul jaýapty matchtarǵa tastúıin daıyndyqpen barý qajet-aq.
Foto: fca.kz
