Fýtbol: «Astana» Qyzylordada «Qaısardan» súrindi
NUR-SULTAN. QazAqparat - Búgin fýtboldan Premer-lıga komandalary arasyndaǵy Qazaqstan chempıonatynyń tórtinshi týr oıyndary máresine jetti, dep habarlaıdy QazAqparat tilshisi.
Esterińizge sala ketelik, keshe elimizdiń tórt qalasynda oıyndar ótkizildi. Onda «Ertis» «Tarazdy» 2:0, «Tobyl» «Aqtóbeni» 2:1, «Ordabasy» «Jetisýdy» 1:0, «Qaırat» «Oqjetpesti» 4:1 esebimen jeńgen edi.
Búgingi alǵashqy kezdesý Qyzylorda qalasynda ótti. Jergilikti «Qaısar» elordalyq «Astanany» qabyldady. Qyzylordalyq klýb 2015 jyldyń 25 sáýirinen beri atalmysh qarsylasyn jeńe almaı keledi. Sodan beri toǵyz oıyn ótti. «Qaısar» azýly qarsylasynyń osal tusyn tappaq dal. Alań ıeleri búgingi kezdesýde jeńiske jetýge jaqyn boldy. Dese de, olar óz maqsatyna jete alǵan joq. Oıyn 0:0 esebimen teń aıaqtaldy.
Búgingi ótken taǵy bir kezdesýde de esep ashylǵan joq. Óz qalasyndaǵy alańnyń daıyn bolmaýy sebepti qarsylastaryn elordadaǵy «Astana-Arena» stadıonynda qabyldap júrgen «Atyraý», bul joly Qaraǵandynyń «Shahterimen» sheberlik baıqasty. Eki komanda bir-birine gol soǵa almady.
Besinshi týr oıyndary 14 sáýir kúnge josparlanǵan. Onda «Shahter» men «Ertis», «Taraz» ben «Qaısar», «Oqjetpes» pen «Tobyl», «Jetisý» men «Qaırat», «Astana» men «Ordabasy», «Aqtóbe» men «Atyraý» kezdesedi.
Foto: «Astana» FK
