FÝTBOL: «Astana» FK bıylǵy Qazaqstan Sýperkýbogyn ıelendi
ASTANA. QazAqparat - Búgin «Astana Arena» stadıonynda «Astana» men «Qaırat» (Almaty) komandalary arasynda fýtboldan Qazaqstannyń Sýperkýbogy úshin kezdesý ótkizildi. Ony QR Prezıdenti N.Á.Nazarbaev tamashalady.
Bıylǵy maýsymdaǵy alǵashqy match asa tartysty ótkenimen, toqsan mınýt boıy, odan keıingi qosymsha eki taımda da esep ashylmady. Sýperkýbok taǵdyry oıyn sońynda penaltı soǵý kezinde sheshildi. Munda, ásirese, «Astana» klýbynyń qaqpashysy Nenad Erıch almatylyqtar soqqan úsh birdeı dopty qaıyryp, erlik jasady. Jeńis núktesin astanalyqtardyń kapıtany Abzal Beısebekov qoıdy. Sóıtip penaltı soǵýda 3:2 esebimen basym túsken «Astana» el Sýperkýbogyn utyp aldy.
