Fýtbol: «Astana» el birinshiliginde kósh bastady
ASTANA. QazAqparat - Búgin fýtboldan premer-lıga komandalary arasynda Qazaqstan chempıonatynyń kezekti, jetinshi týrynyń oıyndary boldy, dep habarlaıdy «QazAqparat» tilshisi.
Kókshetaýdyń «Oqjetpesi» men «Astana» arasyndaǵy oıyn elordanyń «Tarlan Arena» stadıonynda ótip, astanalyqtardyń iri jeńisimen aıaqtaldy. Birinshi taım sońynda kongolyq legıoner Jýnıor Kabananga 11 metrlik aıyp dobyn soǵa almaǵanymen, astanalyqtar qalǵan múmkindikterin qalt jibergen joq. 61-mınýtta Qazaqstan ulttyq quramasynyń oıynshysy Serikjan Mujyqov esep ashsa, úsh mınýttan keıin bosnııalyq Srdjan Grahovats penaltıdi dál oryndady. Al 79-shy mınýtta ulttyq quramanyń taǵy bir múshesi Roman Murtazaev kezdesý núktesin qoıdy.
Sóıtip, «Oqjetpesti» 3:0 esebimen tizerletken «Astana» qatarynan besinshi márte jeńiske jetip, jeti oıynnan keıin 16 upaımen jeke dara kósh bastady. Óıtkeni bul týrda osyǵan deıin birinshi orynda kele jatqan Pavlodardyń «Ertisi» Qyzylordada «Qaısarmen» 1:1 esebimen teń oınady. Brazılııalyq Rodrıgo 84-mınýtta esep ashqanymen, pavlodarlyqtar bul basymdylyqty saqtaı almaı, eki mınýttan keıin alań ıelerinen býrýndılik Saıdı Ntıbazonkıza tarazy basyn teńestirip ketti.
Búgin taǵy eki kezdesý teń nátıjemen bitti. Tarazda jergilikti klýb pen Oraldyń «Aqjaıyǵy» arasyndaǵy oıynda esep ashylǵan joq. Ekinshi taımda «Aqjaıyqtan» paragvaılyq Freddı Koroneldiń pasynan keıin Rýslan Valıýllın baspen soqqan dop qaqpa mańdaıshasynan keri serpildi. Al oraldyqtardyń kapıtany Meıram Sapanovtyń alystan tepken dobyn «Tarazdyń» qaqpashysy Vladımır Logınovskıı qaıtaryp úlgerip, óz komandasyn goldan aman saqtap qaldy.
Osylaısha, qazaqstandyq maman Vahıd Masýdov jattyqtyratyn «Aqjaıyq» tórt márte qatarynan teń oınady. Qaraǵandynyń «Shahteri» Temirtaýda bıylǵy chempıonatta júldeli orynnan úmitkerlerdiń biri Qostanaıdyń «Tobylyn» qabyldap, 1:1 esebimen teń tústi. Aldymen alań ıelerinen Sergeı Skoryh birinshi taım sońynda óz qaqpasyna gol soǵyp alsa, 48-mınýtta Dáýrenbek Tájimbetov tarazy basyn teńestirdi. Bul kezdesýdiń sońy tóbelespen aıaqtalyp, qos birdeı fýtbolshy alańnan qýyldy.
«Aqtóbe» men «Atyraý» matchy keıinge qaldyrylsa, ortalyq kezdesý Almatyda «Qaırat» pen «Ordabasy» (Shymkent) arasynda ótti. «Qazsport» telearnasynan tikeleı efırde kórsetkenindeı, 6-mınýtta oń qaptaldan aıyp alańyna engen «Qaırattyń» ári Qazaqstan quramasynyń kapıtany Baýyrjan Islamhan dál kózdep, esep ashty.
Birinshi taım sońyna taman almatylyqtardyń surmergeni, Kot-d'Ivýar eliniń ókili Jerar Goý bıylǵy chempıonattaǵy jetinshi golyn soǵyp, esepti 2:0-ge jetkizdi. Ekinshi taımda 69-mınýtta reseılik Andreı Arshavınniń ádemi pasynan keıin horvatııalyq Ivo Ilıchevıch qaqpa buryshyn dál kózdedi. Astanalyqtar sekildi qarsylasyn 3:0 esebimin oısyraı utqan almatylyqtar 14 upaımen týrnır kestesinde úshinshi orynǵa kóterilse, «Ertis» 15 upaımen ekinshi satyda keledi. Onyń ústine bıylǵy maýsymda bes kezdesýin teń oınaǵan «Qaırat» - ázirge jeńilistiń aşy dámin tatpaǵan birden-bir komanda.
Aıta keteıik, 23 sáýir kúni ótetin segizinshi týrda ortalyq oıyn Pavlodarda «Ertis» pen Almatynyń «Qaıraty» arasynda ótedi. Sondaı-aq «Aqtóbe» «Shahterdi», «Atyraý» «Oqjetpesti», «Astana» «Tarazdy», «Aqjaıyq» «Qaısardy», «Ordabasy» «Tobyldy» qabyldaıdy.
